Vawiin chawhma Dar 11 khan Government Chaltlang High School ten an zirlai tithate chawimawina hun an hmang a, School Education Minister Pu Lalchhandama Ralte-in a hmanpui.

Minister Pu Lalchhandama Ralte chuan he hunah hian thu sawiin kumin HSLC result chhuakah a pumpuiah kum hmasa phak lohna awm mah se, thil lawmawm tak tak a lo lang tih a sawi a. A ti tha top ten ah hming 20 a lang a, chungte chu Mizo chhul chhuak vek an ni tih sawiin hei hian a tih lawm thu a sawi a. Chubakah a pass tha division sang lamah hmasawnna kan nei a, hei hian zirtirtuten zirlaite thiamna tak tak an pek dan a pholang a ni a ti bawk. Sorkar school tam tak kan nei a, top ten-a lang school te han enin sorkar school an lang lo erawhchu tan lak a ngai hle nia a hriat thu a sawi a. Zirtirtute leh zirlaite tan lak zel a tul a, Kum 2020 HSLC result a lo chhuah hunah chuan top ten-ah sorkar school lo lang ve tawh se a duh thu a sawi. Chaltlang High School te chu School compound nei tha, zirtirtu pawh nei tha an nih avangin hma lam hunah pawh beiseina a neih san thu a sawi a. Zirtirtute chu puanven sawi chhing tur leh zirlaite pawhin theih tawp chhuah zel turin a sawm a ni. Chaltlang High School-in zirna pangngai mai bakah co-curricular activities lamah an tihthatzia a lo lang a, tun hnaiah state level leh national levela lawmman la zirlaite zinga an awm thei chu zirtirtute inpekna a ni a, naupangte pawh an vannei hie a ni a ti.

Minister chuan kumin HSLC a topper chu khawsak thuah harsa deuh hlek ni mahse, khawpui chhunga mi awm thei zawkte chungah a awm thei a, hei hian dinhmun sang chu tu ta mah a nih bik lohzia a tarlan thu a sawi bawk.

Chaltlang High School hian kumin HSLC result chhuakah candidate 90 ah pass 84 an nei a, chung zinga 6 chu Distinction-ah an pass a, I Division ah 18, II Division ah 31, III Division ah 29 an pass a ni. Chaltlang High school Class X zirlai R.Vansangkimi chuan tun hnaiah INTACT-in National Level Painting Competition an buatsaihah lawmman pahnihna a dawng a, July 3, 2019 hian Ammedabad-ah lawmman hlan a ni dawn a ni. A ni bakah hian State Level leh National Level a zirlaite intihsiaknaah an naupangte an tir chhuak thin a, Chaltlang High School-ah hian zirtirtu 17 leh zirlai 290 an awm mek a ni.