Kar kalta Inrinni, May 19, 2012 khan Art & Culture Minister Pu P.C. Zoram Sangliana chuan HSLC leh HSSLC Passed te chawimawina, Darlawn Community Hall-a neih chu a hmanpui.
He inkhawm ah hian HSLC-a Mizoram puma St. Pauls’ HSS atanga panga-na dinhmun hauhtu V. Lalrinhlui d/o V.L. Thangluaia, Darlawn khua chu a bika chawimawina thuziak (citation) a hlan a. Ani bakah hian HSLC passed thar mi 54 leh HSSLC passed thar mi 55 te hnenah pawh chawimawina thuziak (citation) hlan theuh an ni.
He inkhawm ah hian khuallian Pu P.C. Zoram Sangliana chuan thu sawiin, zirlaite chu an zirna kawnga taima turin a fuih a. Zirlaite chu chhungte thawhchhuahsa ring ringawt lova, tun atang mahni intodelh tum turin a fuih bawk. Minister bakah hian Khual Zahawm Pu L. Daniela, President, MSU General Headquarters leh Pu Zodinpuia, Secretary, MSU General Headquarters ten thu an sawi bawk a ni.
