No.735/2021-2022

Aizawl 29th May 2021: Hripui leng avangin school kal thei rih lo mahse, sikul naupangten mahni in lamah zirna an chhunzawm theih nan textbook sem thuai tum a ni a, vawiin khan zirlaibute hi District hrang hrangah phurh thlen a ni. 

Samagra Shiksha hnuaiah zirlaibute hi a thlawnin sem a ni leh dawn a, Elementary School zirlai Class VIII chin hnuai lam tan zirlaibute hi sem a ni leh dawn a ni. Heng zirlaibute hi sorkar enkawl school naupangte hnenah a hma thei ang berin sem chhuah a ni dawn a, zirtirtute chu zirlaibu an sem chhuah kawngah hrileng laka himna ngai pawimawh tura beisei an ni. 

Zirlaibute hi Class I-V tan naupang pakhat zelah Rs 250 man leh Class VI-VIII tan Rs 400 man pek an ni dawn a. Naupang pakhat zel tana sanction zat hian Class V hnuai lam chu an zirlaibu a daih thei a, class VI-VIII erawh chu zirlaibu a to deuh tawh a, an main subject pek an ni dawn a ni.