Zirlaite hmaah thihna leh nunna, malsawmna leh anchhia a awm a, tuna an hun hman mek hi an hmalam hun atana inbuatsaihna hun tha, hun rangkachak a ni, Pu R. Lalzirliana chuan a ti. He thu hi vawiina Govt. Aizawl West College Freshers’ Social, Vanapa Hall-a neiha a sawi a ni.

Home Minister chuan mihring nunna hi a rei naah ni lovin a tangkainaah zawk a hlutna an teh thin, tiin mahni hmasial taka nung lova midang tana malsawmna nih theuh tum turin zirlaite a chah a. Taimakna leh thahnemngaihna nen ram chhung mai nilo ram pawn thlenga chhawr tlak ni tura lehkha zir tura fuihin ramchhung sum leh pai dinhmun sang zel thlirin nakin lawkah khawvel ram ropui thlanchhuah zingah India chu a la tel pha dawn tih a lang a, chung hunah chuan Mizo te eng dinhmunah nge kan din ve ang tih hi nakina ramhruaitu tur tuna zirlai te kutah hian a awm, a ti. Lehkha chhiar uar sauh sauh tura fuihin Home Minister chuan khawvel leh ram chhung thil thleng hrang hrang ngaihven tur te, ngaihdan mumal leh puitling tak nei ve zel turin leh an ngaihtuahna leh hawiher pawh khawvel huap ni turin a fuih a. College Campus vela tei khawtlai mai mai aiin Library chhunga ngawi renga thut a hlawk fe zawk tih sawiin kum 10 a ral leh chuan dinhmun inangtlang renga ding te hi dinhmun inthlau takah an la awm dawn, Pu R. Lalzirliana chuan a ti.

Govt. Aizawl West College zirlai kalthar te lawmna puala inkhawm hi Student Union Vice President Rocky Lalnunsiama’n a kaihruai a. An Principal Dr Laithanzauva’n inlawmna thu sawiin Student Union General Secretary Lalhriatsanga’n kum hmasa lama an College chetvelna tlangpui a tarlang a ni.