Vawiin khan Parliamentary Secretary Pu K.S Thanga chuan Aizawl District huamchhung Agriculture Technology Management Agency (ATMA) Exhibition chu Aibawk Community Hall-ah a hawng.

Exhibition hawngin Pu K.S Thanga chuan leilung piantirh atang tawh rengin kuthnathawh hi eizawnna tling leh zahawm a ni a, chuvangin mirethei leh dawmkan ngai te chhawm chhuah nana sorkar hmalakna lian ber NLUP tum ber pakhat chu kuthnathawha eizawnna tluantling thlen a ni, a ti. District pum huap Exhibition changtlung tak Aibawk tlangdunga nghah a ni thei chu a lawm thu sawiin hei hian helai tlangdunga kuthnathawktu te hnenah chona lian tak thlen thei ngei se a ti a. Assembly bial tam takah chuan NLUP thawhchhuah hmuh tur a awm tawh a, Sateek tlangdung mipui te pawh hian chu chu hriain an NLUP dawn hmang tangkai turin a chah a ni. Parliamentary Secretary chuan leilet siamtu te hnena Tractor leh Power Tiller thahnem tak semchhuah a nih thu sawi nawnin tangkai taka an hmanzui turin a chah a, State lian zawk te pawhin an tihtheihloh za a 75 laiin sorkar chuan a leina man a tumsak a ni, a ti.

ATMA hnuaiah hian a kaihhnawih Department pasarih zet a awm a, chung te chu Agriculture, AH &Vety, Horticulture, Fisheries, Soil and Water Conservation, Sericulture leh College of Animal Husbandary and Veterinary Sciences (KVK Section) te an ni. Exhibition hawnna inkhawm hi Aizawl District AH &Vety Officer Dr Hmarkunga’n a kaihruai a, District Agriculture Officer Pu H. Thankhuma, ATMA Aizawl District Project Director ni bawk chuan report a pe. Thlai chi hrang hrang, pangpar, thei, ranvulh - ar, sazupui, sai ar leh a dangte bakah NLUP tharchhuah fu leh kurtai te pholan an ni.