Vawiin khan Govt. Higher Secondary School, Mamit ah National Voters’ Day 2017 thupui “Empowering young and future voters” kalpuina pakhat atan Voter Awareness Campaign neih a ni a, Pi Lalbiaksangi, Deputy Commissioner, Mamit leh District Election Officer ni bawk chuan a hmanpui.
He hunah hian Pi Lalbiaksangi, District Election Officer chuan School naupang kalkhawmte hnenah Electoral Roll-a inthun pawimawhna leh vote thlak pawimawh zia a sawi a. Electoral Roll atana hman Form hrang hrang - Form 6 (inclusion), Form 7 (deletion) leh form 8 (correction) chungchang te a hrilhfiah bawk.
He Awareness Campaign hi Pi Lalzikpuii SDC, AERO chuan kaihruaiin Vote nei thei chin te electoral roll a in thun ngei a pawimawhzia a sawi a, ngaihtuahna tlang tak nei chunga vote thlak chu khua leh tuite mawhphurhna a nih thu sawiin Power Point Presentation hmangin zirtirna a pe a ni.
Mamit khaw chhung bakah Mamit District-a khaw hrang hrang a High School leh Higher Seconday School ah bialtu ERO leh AERO ten he ‘Interactive School Engagement’ programme hi an lo kalpui tawh bawk a ni.
