Vawiin khan Government Zirtiri Residential Science College chuan Electric Veng Indoor Stadium-ah a vawikhatna atan Cultural Day an buatsaih a, an College-a Senhri Cultural Club-ina Art & Cultural Department hnuaia affiliation tunhnaia an hmuh lawmna hun an hmang bawk. He hun hi Pu Lal Thanzara, Parliamentary Secretary to Chief Minister in a hmanpui a ni.

Pu Lal Thanzara chuan khawvel khawi hmunah poh kal ila, nihna (identity) min pe tu chu kan hnam ziarang(culture) a nih thu sawiin hei hi chhuhsak ngawt emaw, intawmpui emaw a theih loh a ni, a ti. India ram ropuina chu a chhunga cheng hnam leh culture te an hausakna avang a nih thu sawiin, Mizo te pawh hi India ram ti ropui tu te zingah kan tel a, Cheraw kan te leh puanchei nena inthuam lai te hi national integration campaign-ah te tihlan a ni fo thin a ni, a ti.

Parliamentary Secretary chuan tunlaia KTP leh YMA Branch hrang hrang ten ‘Zo Zan’ an hman thin chu tha a tih thu sawiin hei hi thangthar tam takin kan lo chawrchhuah dan te an hriat phah bakah ‘Zo’ nih zahpuilohna te a rawn tih lar zel ka beisei a ni, a ti. Zirlai te chu an nitin in cheina ah Mizo inchei dan senglut tam turin leh a rem leh a mawina chin ah chuan Mizo thil ngei in bel a, uar thar leh turin a chah a, hnam ziarang humhimna kawnga hma la zel turin a fuih bawk a ni.

He hunah hian College Principal Pu J. H. Zoremthanga pawhin thu sawin hnam zia vawn a tul thu te sawiin zirlai te chu an nunah Mizo zemawi hrang hrang te seng lut leh lanchhuah tir thin turin a fuih a ni.

Vawiina Cultural Day hi chhawng hnih a hman a ni a, zirlai ten Mizo hnam lam hrang hrang te an entir bakah zai te ngaihthlak a ni.

Senhri Cultural Club hi College Students’ Union hnuaia awmin kumin February ni 5 khan Art & Culture Department hnuaia affiliation an nei a. He pawl in a thil tum ber chu hnam lam leh hnam zia hmanga zirlaite inpawh tawn theihna tura tan lak leh zirlaite a tam thei ang ber hnam lam thiamtir a ni.