Vawiin nileng khan Aijal Club ah Higher Secondary School Lecturers Association of Mizoram ( HISSLAM ) te chuan 17 th Annual General Conference 2015 an hmang a. Pu Joseph Lalhimpuia Parliamentary Secretary, Education Department leh Pu K. Lalthawmmawia, Director ,Education Department ten an hmanpui a ni.

Sorkar in Mizoram-ah kum 1996 atanga Higher Secondary School a din atangin hmasawnna tam tak hmuh tur awmin tunah hian HSS hi sawmli chuang din a nih tawh thu Khuallian Pu Joseph Lalhimpuia chuan sawiin Government Lecturer phei chu zanga chuang an awm mek a ni a ti. Zirtirtu hna hi a zahawm in a ropui a, Isua Krista te, India President thlah liam tak Abdul Kalam te chu zirtirtu tia hriat leh koh an ni thin tiin HSS zirtirtu te chu zirlai thahnem tak pan lai nun kalsan mek, puitlin lam kawng zawh tur leh hun pawimawh tak hmang chho mek te kaihruaia zirtirtu an nih avanga sorkar pawh in a theih anga duhsak in building leh thildang tel miah lovin kum tin cheng nuaih 6000/- chu HSS zirtirtu te tan sen ral a nih thu a sawi. Naupang 1,33,101 zet in exam an paltlang tawh bawk a ni.

HSS Principal leh zirtirtu te pawh in enfiah a ngai hle tiin Pu Joseph Lalhimpuia chuan Association tana hmalak a tha in a pawimawh a, chutih lai mek in an enkawl zirlai naupang te hmakhua an ngaihsak in hmalam hun tur an dawnpui tak tak em tih hriat a tul a, an enkawl naupang te hi Rawlthar leh Tleirawl - Adolescence period hmang mek te an ni a, intifing leh hre ber anga inngai, mahse hre tam si lo, kalna tur hre thui chuang lo leh hmalam thlir thui thiam lo an nih avangin enkawl an awlsam lo va, namnul mai lovin ngaihtuahna seng tak meuha enkawl an tul thu leh, zirlaibu tlemte an zirtir mai bakah finna leh thiamna, hriatthiamna zirtirna kawngah an pai tel a ngaiin inbuatsaihna tha tak nen zirtir tur leh zirlai te tana nghawng tha zirtir thiam thin tur in a fuih .

Kan Designation chhungah hian enge tih tur duty kan neih a, kan mawhphurhna enge tih kan hriat a ngai a, chutih lain kan thawhpui te, kan aiawha mawhphurhna latu kan hotu te thu awihin chawimawi dan thiam a tul a ni, tiin Khuallian chuan Education lam hmasawnna atan tunah hian Hostel Rules peihfel tep a nih thu leh Serchhip leh Lungleiah Education lam hmasawnna tur atana hmachhawp te peihfel mek a nih thu a sawi bawk a ni.

Pu C Laldinliana Vice President HISSLAM kaihhruai vawiin programme ah hian Khual zahawm Pu K. Lalthawmmawia Director Education Department leh Pu B.Lalchhuanliana, Additional Director, Education Department te pawh in thu an sawi a, report hrang hrang ngaihthlak niin member thi sunna hman a ni bawk. Chawhnu lamah agenda hrang hrang neiin rorel a ni a, School tan hun ennawn leh chungchang te leh HISSLAM Constitution chungchang leh Lecturers te puala Orientation leh Refresher Course chungchang leh thil dang tam tak an relho a ni.