Social Welfare Department-in hmeichhe humsual daite enkawlna hmun a siam Protective Home din champhaphak vawi 25-na lawmna hun chu vawiin khan Social Welfare Minister Pu PC Lalthanliana hovin Chanmari West-a Protective Home Complex-ah neih a ni.
Pu PC Lalthanliana chuan Social Welfare Department chu mi harsa leh chhumchhia, dawm kan ngai leh humhim ngaite humhim a, hmeichhe rahbi tleute enkawl leh an himna ngaihtuahtute an nih avangin sawrkar hna dang anga thawh theih a ni lova, missionary thinlung pua thawh a ngai a ni, a ti. Protective Home silver jubilee an hmang thei chu lawmawm tiin thawktute inpekna leh thahnemngaihna a fak a. Sualna lo pung zelah hmeichhe vanduaina tawk an pun zel avangin tha thlah lova thawk sauh sauh turin a chah a ni.
Social Welfare Minister chuan Protective Home tiphuisui tura hma an lak mek dan sawiin North Eastern Council leh State share atanga sum hmuh hmangin hma lak mek a ni, a ti a. Sawrkar pawmpui company an rawih mek te’n tha tak leh belhchian dawla hna an thawh ngei a beisei thu a sawi a ni. Social Welfare Minister hian Protective Home Silver Jubilee Souvenir a tlangzarh nghal bawk.
Protective Home hi kum 1990-ah hetihlaia Social Welfare Jt.Director Pi Lalzarliani Hmar leh mi thahnemngai dangten an din a, Pi Lalzarliani Hmar hi Superintendent hmasa ber a ni. Suppression of Immoral Traffic Act (tuna ITPA) hmanga din a ni. He Home-ah hian hmeichhe humsual dai admit-te awm hun kum khat chhung hian an nitin mamawh pek an nih bakah an hriselna leh case history te lain an awm chhunga an hun hman dan turte ruahmansak an ni. Puanthuai, puantah, embroidery, carpet weaving, computer leh thiam thil dangte zirtir thin an ni a. Pathian thu lamah uluk taka kaihruaiin gospel camping siamsak thin an ni bawk. Lehkhazir thei an awm chuan Hunthar Primary School, Middle School leh NIOS ah te admit thin an ni.
Silver Jubilee lawmna programme-ah hian Social Welfare Director Pi Vanlaldini’n kalkhawmte lawmna thu a sawi a. Protective Home Superintendent Pi R.Lalnunmawii’n report a pe a. Protective Home Chief Inspector-in lawmthu sawiin hun hnung a khar a ni.
