No.6917/2020-2021

   School Education Minister Pu Lalchhandama Ralte chuan tun hnaia sorkarin zirtirtu a lak tharah a thiam thiam, a fit fit lak an ni a,   politics a inrawlh lo tiin vawiina Saitual District Education Office leh District Project Office hawnnaah a sawi.

     Minister chuan ram leh hnam chherna pûm berah politics a inrawlh chuan a fuh lovang tiin tun hnaia Hindi teacher lakah pawh a thiam thiam lak an ni a, lak tur qualify-in an daih lo zawk a, tu sorkar mahin an tih ngai loh chu tun sorkarah hian tih a ni a ti bawk.

    Minister chuan  Saitual DEO leh DPO hawn a ni ta chu Saitual District chanchinah ni pawimawh tak a lo ni ta a. Covid-19 karah thawktute thawhhona a that avangin office hawn theih a lo ni ta a, a lawmawm hle a ni. 

    Minister chuan zirna hi hnam thinlung pu chunga kalpui sorkarin a duh a, zirlaibu siamah pawh a theih chin chinah hnam thinlung putna tur hi telh tum a ni a, ram hmasawn zelna hian hnam hmangaihna a kalsan ang tih a hlauhawm a ni a ti. 

    Pu Lalchhandama Ralte chuan All India Service a Mizo thawk laite an pension zel avangin Mizo nula tlangval an luh tam theih nan screening neiin a thiam thiam mi 20 chu Delhi-ah thawn thlain an senso sorkarin a tum dawn a ni a ti bawk. 

    Minister chuan khaw tinah Education hi invalh hmasa a ni a, hmun hma pawh a nei tha tih sawiin District thar a lo pian hian heng hmun hma te hi khawtlangin thildang atan an it mek a. Heng hmun hma te hi duat a, humhalh a ngai tih sawiin Minister chuan School Education hi Department dang ang ni lovin mipui ta a ni a, neitu rilru pu turin kalkhawmte a sawm nghal a ni.

   Pu C.Lalmuanpuia MLA chuan he hunah hian thusawiin School Education Department-in kawng hrang hrangin hma a sawn zel tih a sawi a. All India Service leh Central Service ah te Mizo kan tlem sawt ta hle tih sawiin IFS hmasa bera kan neih Pu KC Lalvunga kha Saitual atanga tling a ni a, a hnungzuia he District thar hi mithiam thar chherchhuak tur leh District hotu atana Mizo ngei kan neih theih nana tan la turin kalkhawmte a sawm a ni.

  Pu L.Thangmawia Vice Chairman HRD Board pawhin thusawiin District tharin zirna kawnga hma a sawn theih nan DEO leh DPO a nei ta chu lawmawm a tih thu a sawi a. HRD Board-in hma a lakna te a sawi langin thingtlang kilkhawr school-a thawkten teacher quarters an mamawh dan chu Board-in a hriat thu leh hmalak chhoh zel tum a nih thu te a sawi a. College leh University kalte an result nghah laia ram tana chhawrna kawng awm thei se a duh thu a sawi bawk.

   Saitual District tharah hian khaw 41 a awm a, Govt. Primary School 57 a awm a, Govt. Middle School 51 leh Samagra 1, High School Govt leh Samagra 23 a awm a, Higher Secondary School 3 a awm a, heng school ah hian zirtirtu 598 leh zirlai 6018 an awm a ni. 

    Saitual DEO leh DPO hawnna hi Pu VL Hruaizela Khiangte Dy Commissioner & Chairman, District Education Committee-in a kaihruai a, Minister hi Pu L.Thangmawia Vice Chairman HRD Board leh Pu C.Lalmuanpuia MLA bakah Department officer thenkhatten an tawiawm a ni.