No.6916/2020-2021

Vawiin khan The Mizoram Wood Based Industries (Establishment & Regulation) Rules, 2017 leh a hnu zela siamrem hret hret zul zuiin Mizorama a hmasa ber atan Wood Based Industries Licence chu Mamit Forest Division hnuaiah pekchhuah a ni.

Mamit DFO Pu PC. Lalchhandama chuan Wood Based Industries chu hun rei tak atanga beisei tawh a hlawhtlinna hmuh tan a ni ta chu lawmawm a tih thu a sawi a. Hei hian kan thing atanga hlawkna tamtak luangral thin kan ramah a chamban tir dawn bakah sawrkarin chhiah engemaw zat a hmuh belh anga, dan lova thing rukte tihral a harsat tawh dawn avangin rukrukna pawh nasa takin a ven pah theih dawn thu a sawi.

Wood Based Industries te hi chi hnihah then niin Primary Wood based industries chuan thing tum (log) atanga thildang siam lehna a huam deuh bik a, Secondary wood based industries chuan thing zai sa leh hmanrua siamsa atanga thildang siam lehna hmun a kawk deuh bik thung, phalna bik nei an nih loh chuan thing tum (logs) zai phal a ni lo.

Wood Based Industries din tur hian Dilna form hmangin Bialtu DFO hnenah dilna theh luh tur a ni a.Tihtur hrang hrang zawh hnuah State Level Committee in a thlir leh hnuah, pawmtlak nia a hriat te chu Sawrkar pawmpuina a dilpui thin. Sawrkarin a pawmpui hnuah chauh License hi pekchhuah theih a ni.

Khawtuala thingzai khawl hmanga thingzai thin kan hmuh tlanglawnte pawh hi Bialtu DFO hnenah in register vek tur a ni a, License erawh a ngai lo. An hmanruate dan ang taka lak/neih an ni vek bawk tur a ni. Dan zawm lo te chu dan anga hremna pek zel theih an ni ang.

Vawiin-a License pekchhuahte hi Pi Lalhmangaihi (Hriata Enterprise & Saw Mill) leh Pi Maggie Lalnunsangi (DCM Wood Based Industries) te an ni.