He ni ropui tak 'ZIRTIRTUTE NI' hi India ram pumpuiah urhsun taka hman thin a ni a. He ni pawimawh tak ZIRTIRTUTE NI 2008 hi vawi 47 kan hmanna tur a lo ni ta reng mai. A lawmawm tak zet a ni.
        A hmasa ber atan - Zirtirtute leh pension tawh zawng zawng chibak ka buk che u a. Rim taka zirtirna hna ropui in thawhnate hrerengin, duhsakna leh chawimawina ka hlan che u a ni. Zirtirtu, chatuan ram min pansantate chhungkua leh natna tuartute hnenah tuarpuina ka hlan bawk a che u.
        Zirtirtute hi ram leh hnam chherchhuaktu leh dintu an ni tih hi i hre nawn leh ang u. An pawimawhna leh mawhphurhna sang tak hriatreng hi ram mipuite bat a ni. Khawvela miropui leh mithiamte hi zirtirtute kut chhuak an ni a. Ram hruaitu ropui zawng zawngte leh miropuite hian zirtirtute hi an zah thiamin an hlutna hi an lo hre chiang khawp mai.
    Dr. Sarvepalli Radhakrishnan, India ram President 2-na, zirtirtu ropui leh mithiam chungchuang piancham September ni 5, 1888 hi 'ZIRTIRTUTE NI' atan hman a ni a. He ni hi kum 1962 atangin India ram pumpuiah urhsun taka hman thin a lo ni ta a ni.
        Dr. S. Radhakrishnan hi "Zirtirtu ropui ber" tiin India ram Prime Minister hmasa ber Pu Nehru chuan a hming atan a sa hial a. Khawvel pa lar leh hmingthang Bertrand Russel-a pawhin "Hun khirh lai ber pawha remhre chungchuang, India chawimawitu" tiin a lo sawi chhuak ve bawk a. He chawimawina thute hian Dr. S. Radhakrishnan-a ropuizia a tilangin chawimawi phu a nihzia a tichiang khawp mai. Hetiang mi ropui piancham "Zirtirtute Ni" atana hman hi a inhmeh a, ni ropui a nihzia a tarlang chiang hle a ni.
        Kum 1962 atang khan he ni ropui takah hian ram hruaitute - India President-te, Prime Minister-te, Education Minister-ten thuchah ropui ram mipuite hriat atan an puangchhuak thin a. Hengte hian "Teachers' Day" hlut bikna a tilang chiang zual a ni.
        Zirtirtute Ni - ah hian zirtirtu tha thlan chhuahte hnenah chawimawina hlan a ni thin a. National Award dawngtute chu India ram khawpui New Delhi-ah India President-in a hlan thin. Tin, State Award dawngtute chu State tina Chief Minister in an hlan ve thin a ni.
        Kumin 2008 hian National Award zirtirtu pahnih kan nei ve a, a lawmawm khawp mai.
    1.       Pu K. Lalluaia, Headmaster, R.M. High School, Aizawl.
    2.       Pu R. Biakzama, Headmaster, Govt. M/S, Electric Veng, Aizawl.

        National Award bakah hian Kum 1997 atangin 'State Teacher Award' Mizoram sawrkarin a lo siam ve a. He State Award hi zirtirtu - 33 laiin an lo dawng ve tawh a. Kuminah zirtirtu 3 in an dawng leh a ni.
    1.    Pu Remsiama, Principal, Govt. Republic H.S.S., Aizawl.
    2.    Pu C. Lalaudinga, Headmaster, Govt. M/S, Ramthar Veng, Aizawl.
    3.    Pu R. Rozika, Headmaster, Govt. P/S - V, Bawngkawn, Aizawl.
        Kumin 2008-a National Award leh State Award dawngtute ka lawmpuiin, duhsakna ka hlan bawk e.
        Directorate of School Education hnuaia thawktute leh zirtirtute thawhrimna avangin :-
    1.    India ram state zawng zawng zingah "Best State Award in Primary Education" a puan niin India ram Vice President-in India No.1 chawimawina Trophy min hlan a. He Trophy hi Dt. 21.9.2007 khan VANAPA HALL-ah ropui taka lawm a ni.
    2.    Kum 15-35 inkar ziak leh chhiar thiam lote thiamtirnaah pawh India rama Adult Literacy Percentage-ah Mizoram kan sang ta ber a. Hlawhtlinna ropui tak leh dinhmun sang tak kan chuangkai ta bawk.
    3.    India rama state dangten an neih ve loh Primary School-a Hindi Teacher kan nei. Primary Hindi Teacher 1187 lak an ni a, hmasawnna ropui tak a ni e.
    4.    Kum 10 chhung (1959 - 2008) hian zirtirtu 4910 zet mai Selection Grade ah hlankai an ni a.
    5.    Zirtirtu tar chak lo leh hriselna thalo te tan Voluntary Retirement Scheme (VRS) pawh hman mai theih a peih tep a ni ta.
        Heng bakah hian zirtirtu tam tak sawrkar hna ngheta lak an ni a. Sikul tam tak dinhmun tha zawka hlankai an ni bawk a. Sikul building tam tak sak that niin, mita hmuh ngei theiha kan sa thei te hi sawrkarin zirna a ngaihsakzia tilangtu a ni. Zirlaite tan pawh scholarship tam tham tak a pek te, free textbook semte, games and sports lama hmasawnna te sawisen a ni lo. Zirtirtute leh zirlaite a hretu vek in ni a. Ka lawmpui tak zet zet che u a ni.
        Kum danga kan tin thin ang bawkin zirtirtu vanduaina leh natna khirhkhan tawkte tanpui nan TOKEN FLAG leh CAR FLAG siam a ni a. Mi thilphal leh thahnemngaite min leisakna pawisa tlingkhawm atangin zirtirtu tanpui ngaite hnenah pek a ni thin. Ram chhunga enkawl ngaite Rs. 3,000/- (cheng sangthum) leh a na zualte Rs. 5,000/- (cheng sangnga) thleng pek an ni thin. Kum 2007 khan he "National Foundation for Teachers' Welfare Fund" (NFTWF) atana thawhlawm dawn zat chu Rs. 4,50,966.00 a ni.
        Kumin 2008 ah pawh zirtirtu tanpuingaite tanpui nan TOKEN FLAG leh CAR FLAG tlawmngai taka min leisak leh turin ka ngen che u a ni. He ni ropui tak hi zirtirtute chawimawina rilru pu chungin hlim takin i hmang theuh ang u.
Ka  lawm e.