Kum tina hman thin India ram hruaitu ropui leh Educationist Dr S.Radhakrishnan piancham lawmna pualin Zirtirtute Ni "Teachers' Day" chu vawiin khan Saiha-ah ropui leh urhsun taka hman a ni. Zitirtute Ni hi September Ni 5 a hman thin nimahse kumin-ah chuan Pathianni anih avangin vawiin hian hman a ni ta zawk a ni.

He Ni hi Saiha-ah chuan School naupang ten mahni school theuh-ah urhsun taka hmangin an zirtirtute chawimawina ni atan an hmang a, School naupang ten an zirtirtute Parthi an awrh tir bakah thilpek chi hrang hrangte pe in an chawimawi a ni. Saiha District chhunga sawrkar department hrang hranga hotute pawhin School hrang hrangah inthen darhin he Ni lawmna hi an hmanpui bawk. Pu Kunal IAS District Bawrhsap chuan Don Bosco School, Saiha-ah "Teachers are a bridge to the future" tih thupui hmanga Teachers Day an hmanna hi hmanpuiin zirtirtute chu naupangte tana entawn tlak nun nei theuh turin a chah a, zirlai naupangte pawh an zirtirtute zah thiam a zuk leh hmuam laka fihlim tur leh faina ngai pawimawh a thiamna tak tak paw chhuak thei tura taima taka an zirlaite zir turin a chah bawk. He Ni lawmna denchhen hian Middle School, High School leh Higher Secondary School te tan Dt 3.9.2010 khan DCs Conference Hall, Saiha-ah "Painting Competition" hlawhtling takin neih a ni tawh a. He Competition a tithate hnenah hian District Bawrhsap Pu Kunal IAS chuan vawiin khan Don Bosco School, Saiha-ah lawmman tangkafai pakhatna Rs 1500/- pahnihna Rs 1200/- pathumna Rs 750/- bakah Consolation Prizes mi 15 hnenah Rs 500/- theuh leh certificate a hlan nghal bawk. He Teachers Day hmanna ah hian zirlai an tel thahnem hle a ni.