Zirtirtute-Ni ‘Teacher’s Day’ chu Mizoram chhung District hrang hrangte ang bawkin Saiha-ah hman a ni. He Teachers Day hi September Ni-5 ni mahse School chawlhni a nih avangin vawiin hian School hrang hrang ten anmahni School theuh ah an hmang a. School hrang hrang a zirlaite chuan an zirtirtute hnenah thilpek chi hrang hrang an hlan a ni. Kum danga lo tih thin angin kumin pawh  hian Token Flag leh Car flag te buatsaih a ni a, hengte hi mipuite hnenah zuarin sum tuak nan tih a ni. Hemi atanga sum hmuh te chu zirtirtu harsa zual natna khirhkhan tuarte tanpui nan pek an ni leh dawn a ni.
Kum kalta chhung khan Mizoram pumah zirtirtu natna khirhkhan tuar mi - 63 hnenah chhawmdawlna thilpek Rs 2,47,000/ hlan an ni tawh a, Saiha District chhung atang pawhin Pu Zathanga, Headmaster, Tuipang Middle School hnenah hlan a ni tawh a ni. He Ni pual hian Pu Lalsawta, Education Minister chuan mipuite hnenah thuchah sawiin, zirtirtute chu thim zing ata enna min petu an nih avangin zahna kan hlan a ngai a ni, a ti a. Mizoram khawpui leh District hrang hrangah vawiin Teacher’s Day hi hi hlim taka hmang theuh turin Mizoram Federation of Government Teachers Association (M.F.G.T.A.) chuan duhsakna an hlan bawk a ni.