No.2397/2021-2022

Aizawl the 30th September, 2021 : Nimin ni 29.9.2021 (Nilaini) khan Human Resource Development Board bultumin zirtirtute pualin educational technology zirhona webinar hmangin buatsaih leh a ni.

Nizana Webinar neih hi Pu Lalhmachhuana SPD Samagra Shiksha chuan a kaihruai a, Dr Lalzirmawia Chhangte, Secretary chuan khuallian niin he hun hi a hmanpui a ni. Dr Lalzirmawia chuan he hunah hian thusawiin zirtirtute chu Lal Isua nihna 'zirtirtu' tih tawmpuitu an ni a, hna dang thawk anga duhdah theih a ni lova, mite beisei dan pawh a sang a ni a ti. Zirtirtute chu an hna theuhah thiam, bel leh zei ni turin a fuih a ni. Secretary chuan zirtirtute chu an naupangte chhawrtlaka chher chhuak tur leh Mizo tawng bakah tawng dang pawh hmang thei tura chher chhuak turin a fuih bawk. Zirlaite chu an thiam danah a vantlang an nih mai a tawk ta lo tih hre reng chungin zirtirtuten rualelna rilru an puttir a ngai a ni a ti bawk.

Webinar kaihruaitu Pu Lalhmachhuana, SPD pawhin thusawiin World Bank-in an teh danin Covid avangin khawvel ram hrang hrang hi Human Development Index-ah leh Human Capital Index-ah an tlahniam vek a ni a ti a. Tunah hian zirna lamah hmalam pan turin class pangngai a neih theih bawk si lova, Educational technology hi a pawimawh ta hle a ni a ti bawk.

Nizan Webinar-ah hian 'Tools and methods of e-contents creations' tih Dr. Samuel Lalmuanawma Govt Champhai College-in a sawi a. 'e-content delivery and Learning Management System' tih Pu C. Zoremsanga, Scientist 'C' NIELIT chuan a sawi bawk.

Nizana Webinar neihah hian Middle school, High school leh Higher secondary school zirtirtu, Science leh Mathematics teacher ni lo zawngte an tel a. Mi 1800 chuangin hmun hrang hrang atangin an zawm a ni. Hemi hma lam hian Science leh Mathematics teacher te tan buatsaih a lo ni tawh bawk a ni.