No.2216/2021-2022

Aizawl the 15th September, 2021 : Nizan khan Human Resources Development Board bultumin Middle School leh High School Science leh Mathematics zirtirtuten hripui len laia online-a naupang zirtirna atan Educational Technology hman tangkai dan inkawhhmuhna Webinar an nei.

He Webinar hawnnaah hian khuallian School Education Secretary, Dr Lalzirmawia Chhangte chuan thusawiin hripui leng avangin hun rei tak class pangngai neih theih a ni lova, naupang zirtir nan technology-ah a innghah loh theih lova, technology hi hman thiam dan a inchen loh avangin thiamna leh experience te inhrilhhriat tawn a ngai ta hle a ni a ti. Hripuiin eng chen nge nunphung a tihbuai dawn tih a hriat lohva, hripui a kian hnuah pawh Educational Technology tel lovin a kal theih dawn tawh loh tih sawiin tunlai thiamna hman tangkai chu naupang zirtir nan hmanraw hriam leh tih makmawh a nih thu a sawi bawk.

Webinar kaihruaitu Pu James Lalrinchhana, Director, School Education pawhin HRD bultuma Educational technology zirhona webinar neih a ni ta chu lawmawm a tih thu a sawi a. Zirtirtute tan hmasawnna leh zirtirna kawnga hma lam panna tha tak a nih a beisei thu a sawi.

'Webinar on Educational Technology for helping Middle School and High School Teachers during Covid-19 pandemic' nizana neihah hian Technical session chu Dr C.Lalnuntluanga, President, Mizoram IT Society-in a kaihruai a. Thupui hrang hrang hmanga zirtirna neihah hian 'e-contents creation and development' tih Vanlalzarzova Faculty, NIELIT Aizawl-in a sawi a, 'e-contents delivery and LMS' tih C.Zoremsanga Scientist C, NEILIT, Aizawl-in a sawi bawk.

Webinar hi zanin dar 7-ah chhunzawm a ni leh dawn a, Pu L.Thangmawia, MLA, Vice Chairman, HRD Board chuan khuallian niin he hun hi a hmanpui dawn a ni.

Zirtirtute tanpui nana Educational Technology zirhona Webinar hi HRD Board bultumin Directorate of School Education, Directorate of SCERT, Science Teachers Association of Mizoram (STAM) leh Mizoram IT Society te tangkawpin an buatsaih a ni. Nizan khan Science leh Mathematics zirtirtu 800 chuang he webinar-ah hian an tel a ni.