No.2217/2021-2022

Aizawl, the 15th September 2021 : Nimin khan Pu R. Lalzirliana, Power & Electricity leh Land Resources, Soil & Water Conservation changtu Minister chuan Land Resources, Soil & Water Conservation Department hnuaia Range Office thar Saitual ah a hawng a. Minister hi Pu Lalrintluanga Sailo, MLA leh Deputy Govt. Chief Whip, Er. H. Lalzirliana, MLA, Vice Chairman Road & Infrastructure Development Board leh Pu Rochhunga Ralte, Vice Chairman Land Revenue and Survey Board ten an tawiawm a ni.

Range Office, Land Resources, Soil & Water Conservation hawnna Saitual Auditorium a neihah Pu R. Lalzirliana chuan politics a luh atanga hun rei tak chhung a lo suangtuah thin leh hlawhtlinpui ngei tuma nasa taka a lo beih, Saitual khawpui District thuthmun ani ta chu a tum a hlawhtlin avangin ropui a tih thu leh Pathian malsawmna leh tanpuinaa hlawhtling a nih thu sawiin District mamawh leh ruhrel hrang hrangte chu zawi zawi a buatsaih a ni dawn a, heng thil te hi hmanhmawh leh vawi leh khata thil tih chi anih loh thu a sawi tel bawk a ni.

Range Office hawn thar chu Saitual District a kuthnathawktute, a bik takin rubber chingtu ten an hlawkpui ngei a beisei thu sawiin rubber enkawl zuina tur NABARD loan cheng nuai 680 kaltlangin rubber chinna kawngah hun thar a in her chhuah ngei a beisei tih pawh a sawi bawk a ni. Minister hian Saitual District huam chhunga rubber chingtu chhungkaw 30 hnenah bawngtuthlawh, suahdur leh PVC pipe bundle khat theuh a hlan a ni.

Programme hi Pi K Lalrinzuali, Secretary, LR, S &WC Department chuan kaihruaiin Department chanchin leh hma lakna te chu Pu Hualthanga Chhakchhuak, Director, LR, S &WC Department chuan a tarlang a ni.