3882/2023-2024

Dated Aizawl, the 19th February, 2024: Vawiin khan Zoram Medical College Faculty & Doctors Association (ZFDA) hruaitute chuan Chief Minister Pu Lalduhoma chu a office-ah CM Relief Fund atan cheng singli an hlan.

Chief Minister hian lawmthu a lo hrilh a. An mamawh an sawi te a ngaihthlaksak. ZMC in National Medical Commission endikna a paltlang theih nana hma a lak dan tlangpui a lo hrilh a. Tun leh tuna mamawh nghal thilte lei nan Mizoram sawrkarin Rs. 1.2 crore kan pe tawh a, abak mamawh dangte leina leh thawhna tur pawh central sawrkarah, min phalsak angin, fund kan dil a. MP election model code of conduct an puan hma ngeia a hmahruai min rawn pek hman kan beisei a ni, a ti. National Medical Commission tehna thil tam takte chu Mizoram angah a tlin ve theih loh thute pawh ka thlen a, ngaihhnathiamna min pe turin ka ngen a, min tihsak pawh kan beisei a ni, a ti. ZFDA thil thlen dangte pawh uluk taka a lo zirchian tur thu Chief Minister hian a hrilh a ni.

ZFDA hruaitute hian Chief Minister hi lawmpuina an hlan a, ZMC hmasawnna tur a ngaihpawimawh avangin Delhi thlenga an mamawh a sawisak chu an lawm hle tih an hrilh a, ZMC President a nih anga an hmunhmate tlawh turin an sawm a ni.

Chief Minister hi Pu TBC Lalvenchhunga, Adviser to Chief Minister-in a tawiawm a ni.