No.3309/2019-2020

Aizawl, the 26^th March 2020 : Vawiin khan Zoram Medical College (ZMC) Falkawn ah, ZMC leh State Referral Hospital a faculty leh doctor ten COVID-19 natna vei te buaipui, enkawl leh hemi chungchanga inkaihhruaina Standard Operating Procedure (SOP) lo duan tawh te intuaihriam nan an sawiho nawn leh a. Medical Superintendent SRH Dr. H.C. Laldina leh Registrar ZMC Dr. Jane Ralte ten he inrawnkhawmna hi kaihruaiin COVID-19 vei an awm takah chuan uluk leh fimkhur lehzuala SOP duan sa hi kalpui a tul tih an sawi a. Doctor ten mutbu pawh tuah hman lova he natna dona kawnga theihtawp an chhuah mek chu chhunzawm zelin, Mizoram mipui te thlamuantu an nihna zawna theihtawp chhuah zel turin an inchah a ni.  

Hun khirh tak khawvel leh Mizoram pawhin a hmachhawn mekah damlo buaipui leh enkawlna kawnga Doctor-te, Nurse-te leh hriselna kawnga thawktu dangten anmahni nunna pawh ngaihtuah chang lova damlote tan theihtawp an chhuah mek laiin thinhrik leh mimal inbeihna lam hawi thu dengkhawng tak tak hriat tur a awm ta mai chu pawi an ti takzet a. Hetiang hi tute mahin ti tawh lo se tia mipuite ngenin Prime Minister meuh pawhin doctor-te, nurse te leh hriselna kawnga thawktu zawng zawngte chu sipai huaisen, ral dotu an ni atih kha hre reng chungin an tan tawngtai sak zawk turin vawiina doctor kalkhawmte chuan mipuite an ngen a. Hetiang thil hriat nuamlo leh anmahni tithlabar thei ang chi thil reng reng tumahin ti tawh lo turin an ngen bawk a ni.