No.2622/2020-2020

Vawiin July 1, 2020 zingkar khan Tourism Minister Pu Robert Romawia Royte leh Prof Lalnunmawia, Bialtu MLA & Horticulture Development Board Vice Chairman te hovin Mizo Cultural Organisation (MCO) hruaitute leh Samtlang VC leh Branch YMA hruaituten Tourism Department hnuaia Zo Heritage Centre dinna tur hmun Samtlang Mualkawi ramah an en a. Samtlang khawtlang hruaitute chuan All NGOs meeting-in a remtih hnuah Vantlang inkhawmin Zo Heritage Centre atana MCO leh Sawrkar pek an phal thu Minister chu an hrilh a ni.

Tourism Minister chuan Mizoram Sawrkar chuan Zo Hnam hrang hrangte hnam ziarang lanna tur Zo Heritage Centre bakah North East India-a hnam hrang hrangte ziarang lanna North East Heritage Centre te dahkhawm tum a nih thusawiin sum leh hmunhma awmdan azirin Asia rama hnam hrang hrangte ziarang lanna tur Asian Heritage Centre te pawh ruahman tel tha a tih thu a sawi a. Thil lian tham leh Hnam khawih thil a nih avangin a hmunhma tur pawh Aizawl hnaih si-ah zau tham tak kan zawng a ni a ti. Minister chuan Zo Heritage Centre hi tourists te hipna a nih piah lamah Khawvel Zofate insuihkhawm nan leh inpumkhat nan a pawimawh avangin Mizoram Sorkarin a ngaipawimawh hle a, Mizorama la awm ngailo leh thil hautak tak ni mahse Heritage Centre din nan hian Foreign Funding beisei a nih thu a sawi.

Bialtu MLA Prof. F.Lalnunmawia pawhin thu sawiin Tourism Minister Pu Robert Romawia Royte hmalaknaa Zo Heritage Centre din tumna awm chu lawmawm a tih thu a sawi a, a bial chhungah awm ngei thei se a duhthu sawiin a tul apianga Minister leh Department te pui tura a inhuam thu a sawi bawk.

Vawiin vek hian Health Minister Dr R.Lalthangliana leh Aizawl East-II bialtu MLA leh Minister ni bawk Pu Robert Romawia Royte te ruahhmannain Civil Hospital Road, Dawrpui kawngko min chu Department hrang hrang- PWD, PHE, Power & Electricity, UD&PA, Health Department te leh Dawrpui Local Council ten an enho a.

Hetah hian Dawrpui veng thenkhatin tui pipe chhiat avanga tui an nghei tawh thu report a ni bawk. A hmuna an sawiho hnuah Health Deptt-in a min belh leh hlauhawm laite thiatin vawiin la la atangin hma la se, PHE-in Temporary talin tui line chhia zawmin tui nghei mekte tan tui tihhaw nghal a nih theih nan hma la nghal se tiin a hmunah an rel nghal a ni.