Vawiiin (ni 24 September 2016) hian MZP, Headquarter Manipur chuan YMA Hall, Hmuia Veng, Churachandpur-ah 43rd Annual Conference Cum Meritoriuos Award 2016, an buatsaih a. He inkhawmah hian Pu Joseph Lalhimpuia Paliamentary Secretary, School Education Dept Etc chu khuallian a ni a. Khual zahawmte chu Pu J.C.Ramthanga IAS leh Pu Lungmuana IAS te an ni.

Pu Joseph Lalhimpuia hian he Conference-a a rawn tel dawn hian Chief Minister a rawn thu sawiin, CM chuan Zirlai pawlte hi ram pawn a mizoten buaina an tawh pawha an thlamuanpui thinte an nih avangin a ngaih pawimawh thu leh chumi avanga tel sak ngei a tha a tih thu a sawi a. Chief Minister-in thu a chah tih sawiin, Political Boundaries in min dang mahse thisena kan inzawmnate leh kan in kungkaihna hi engmahin a dang lova tih chak deuh deuh a tul thu a sawi a. Hnamdang hmuha kan lo mawi theih nan Zo-hnahthlakten inpumkhatna tha zawk neih kan neih a tul thu sawiin, Zo Hnahthlak te chu hmun hrang hranga kan ram aiawha awm an nih avangin sawrkar  chu a tih ve theih lam leh a tih ve turahte a tlanchhiat loh tur thu CM hian chah angin a sawi a. Chief Minister hi mizo hnahthlak Tripura leh Burma-a awmte pawhin an thlamuanpui thu a sawi bawk. Pu Lalhimpuia chuan Mizote hi hnam tlemte kan nih angin Churachandpur-ah pawh hian lamhnaite a neih thu leh a mikhual loh thute a sawi a. Tun hmaa Mizote central service-a inziak tling mi engemaw zat an awm thin a, tuna an tlem ta chu pawi a tih thu leh hemi kawnga tan lak a ngaih thu a sawi a. Mizo thalaite ram pawna lehkha zir ngam te hian ram pawna hna thawh tur pawh an zawn ngam a pawimawh a ti a. Tuna Central Service lama kan mithiam tam takte an pension huna an ai rawn awhtu tur kan mamawh thu sawiin inziak tlingte an tlem tak avangin gap zau tak a awm tawh thu a sawi a.

Pu Lalhimpuia chuan Tawng hi kan Mizo-na a ni mai lo va, thisena kan inpumkhatna leh Krista-a kan inzawmna zawkah hian mizote kan insuihkhawm tlat a ngai a ni a ti. Churachandpur mipuite chu kawng hrang hranga an inpekna leh an taih maknaah fakawm a tih thu leh kan pi leh pute identity-a bet heng tlawmngaihna, rinawmna leh taihmaknate hi chhawm nug zel turin kal khawmte chu a chah bawk a ni.

He hunah hian khualzahawm Pu JC Ramthanga IAS chuan MZP Manipur-in inunauna ngai pawimawha programme an huaihawt chu lawmawm a tih thu a sawi a. Lehkha zir taima leh an chawimawite chungah lawmthu sawiin tang sauh sauh turin fuih a. Khual Zahawm Pu Lungmuana IAS pawhin hmingthatna pawimawh zia leh chu mi hlawh chhuak tura beih nasat a ngaih ziate a sawi ve bawk a. Kal khawmte chu Mizo hmel ti mawitu an nih theihna tura tan la zual zel turin a fuih bawk.

He inkhawm hi Pu Paul Lalchhanhima President MZP Manipur-in a kaihhruai a Pu B. Laltana, Vice President MZP General Headquarter Aizawl leh Pu Vanlalrinliana, President, Mizo Peoples’ Convention te thu an sawi bawk.

Pu Joseph Lalhimpuia hi School education officials leh MZP Headquaters Aizawl leh Lunglei MZP Sub Headquater hruaituten an tawi awm bawk a ni.

Pu Joseph Lalhimpuia hi tukin zing khan Mizo Peoples’ Convention hruaituten Mizo Peoples’ Convention office ah kawmna hun an nei a. Mizo Peoples’ Convention hruaitute hian an dinhmun leh an kal hmang te lo hrilh in, hmalakna kal mek an neih te bawhzui ngai awm te an hrilh a. Pu Lalhimpuia chuan MCP hruaitute chu tih theih a neih na apiangah a theih ang ang ah a inpeih reng thu hrilhin MCP hruaitute chu an hma lakna ah fakawm a tih thu leh zo hnahthlak te tana an thlamuanpui thu a sawi a. Zirna lamah thalaiten hma an sawn zel theihnan theihtawp chhuah zel turin a chah bawk a ni.

Attachment

  • Loading attachment...