Vawiin (24.09.2016) khan Lawngtlai District Football Association (LDFA) buatsaih Lawngtlai East MLA Cup 2016 chu zawh fel a ni a. Chawhnu dar 1-a CYLA khelmuala a kharna hun hman chu Lawngtlai East bialtu MLA, Parliamentary Secretary Pu H.Zothangliana'n a hmanpui.

Pu H.Zothangliana chuan infiam mite leh a buaipuitute inpekna leh thawhrimna fakin, tih tak zeta beite tan chuan infiamna chu ei zawnna tlak a ni tawh tih a sawi a. Hlawhtling tur erawh chuan zuk leh hmuam leh ruihtheihthila insum a tul thu a sawi. Thalai hna thawh tur mumal nei lote tana sawrkarin Mizoram Youth Commission (MYC) kal tlanga IAS leh SSC Coaching a buatsaih leh, Labour Employment kal tlanga thalaite tana ei zawnna kawng a hawn chu Laifate'n bawh a, chhawr tangkai thiam a tul a ni, a ti.

Lawngtlai District thalaite'n infiamna lama hma an sawn zel theih nan theih tawp an chhuah tur thu sawiin, bialtu MLA chuan Lawngtlai East MLA Cup pawh MFA-in a hriatpui tham tura chawi kang turin a lawmman lam pawh tihpun a, pakhatnain a dawn tur pawh a sum faia Rs nuai 1 tal ni tawh tura hma an lak tur thu a sawi.

Lawngtlai East MLA Cup 2016 hi zone 3 (Central Zone, Sangau Zone leh Bualpui Zone)-ah screening khelh phawt niin, heta tang hian club 4 theuh an tlang a. He'ng club 12 te hi pool 4-ah club 3 theuhva then niin, he Cup hi an inchuh leh a ni.

Vawiina final hmuhnawm takah hian Vengpui Football Club chuan Council Veng Football Club chu penalty shootout-ah 3-1-a hnehin, nomawi an chawi a ni.