Nimin chawhnu khan Pu Joseph Lalhimpuia, Parliamentary Secretary School Education chuan Aizawl City College Students Union Leader-te leh Hnam Pual hruaitute tana Leadership Training cum Retreat buatsaih chu K.T Resort, Selesihah a hmanpui.

Pu Joseph Lalhimpuia chuan Leadership Training Cum Retreat-ah hian thu sawiin, “Zo hnahthlak pumpui Identity chu ‘Rinawmna’ a ni a. Kan pi leh pu atanga kan tlawmngaihnate leh kan rinawmna te hi kan identity a ni” a ti. Zirlai hruaitu kalkhawmte chu aia upa zahna lantir a, tlawmngaihna leh rinawmna chhawm nung zel turin leh, zirna environment siamthatna kawnga hma la turin zirlai hruaitute chu a chah a ni. Parliamentary Secretary chuan zirtirtu thawk thalo pahnih khatte nungchang vawrhlar ngawt lovin, zirtirtu thate vawrh lar zawk a, chung miten zirna a tana an thawh that chu Zoram mipui tana thehdarh thiam chu a tha in, zirna boruak tan pawh hmasawnna a nih tur thu a sawi a. Thalai tam tak Work Force tha ber ber te chu tunah hian hna thawk thei lovih ruih theih thil chi hrang hrang avangin Home-ah leh Camping Centre-ah te an awm a, anmahni avang hian Sorkar, Kohhran leh chhungkuain sum tam tak an seng mek a ni thin, Pu Joseph Lalhimpuia chuan hetianga thalai rualte zirna leh hnathawh ngaihsak thei lova an awm mek lai hian, zirlai hruaituten zirna boruak tha tak siam a, ram leh hnam tan kawlni eng an siam a ngai ta a ni, a ti a; nakin lawkah kan ram chhunga kan tih theih reng hi hnamdangin min tihsak ang tih a hlauhawm a tih thu a sawi bawk.

Aizawl City College Students' Union Leaders leh Hnam Pual Leadership Training cum Retreat hi Mizo Students Union (MSU) General Headquarter buatsaih a ni a, Aizawl khawpui chhunga College (10) sawm zirlai hruaitute leh Hnam pual paruk zirlai hruaitute an tel a, Pu Joseph Lalhimpuia, Parliamentary Secretary hi NSUI President, Pu Lalhmachhuana’n a tawiawm a ni.