Vawiin chawhnu dar 2:00 khan Parliamentary Secretary Pu Joseph Lalhimpuia chuan Zobawk ah Primary Health Centre sakna tur lungphum a phum.

Pu Joseph Lalhimpuia chuan Zobawka PHC sak tur chu a khaw mipui chauh nilo, a chhevel atanga damlo pan tu an awm dawn avangin khawtlang hruaitu leh mipuite in hawng zau turin a ngen a. Zobawk tana chanchin tha a ni tiin, damna thlentu leh mi harsa te tana tangkai a nih ngei a beisei thu a sawi.

Parliamentary Secretary chuan a Department enkawlte hmalakna leh hmachhawp thenkhat tarlang in, Education Department chuan zirlai harsa ten school tha an kal theih nan Model School district tinah siam tum a ni, a ti a. Zirtirtute tan quarter za (100) sak a ni dawn tiin, NEDP atangin school hrang hrang thawm that nan cheng nuai 490 dah a nih thu a sawi. Kawrpuichhuah ah India leh Bangladesh in sumdawn tawn nan Integrated Check Post chak taka sak mek a nih thu a tarlang bawk.

Director of Health Services Dr. Rohmingthanga Ralte pawhin Zobawk PHC Centre chu khum 10 awm thei tura ruahman a nih angin a thawktu turte pawh dah tam an ngai dawn a ti a, heng thawktute chenna tur quarter sak a la ngaih dawn avangin khawtlang hruaitu te chu a sakna tur hmun ngaihven pui turin a sawm a ni.

Er. V. Lalhmunmawia, SDO, Building Division chuan Technical Report pe in damdawiin Plot Area hi sq.m 432.45-a zau a ni, a ti a. A sakna tur estimate hi cheng nuai 126.75 niin, 13th Finance Commission atanga sum sanction a ni, a ti. Minor Operation Room, mipa leh hmeichhe ward, Laboratory, Medical Officer Room, Ayush leh damlo mutna tur khum 10 leh rain water harvesting na tur litre 5000 te a awm dawn a ti bawk.