596/2023-2024

Aizawl the 26th May, 2023 : Vawiin khan Information and Public Relations Minister Pu Lalruatkima chuan Aizawl Vanapa Hall ah Zofate khawmpuilian, Zo Reunification Organisation (ZORO) buatsaih chu khuallian niin a hmanpui.

Pu Lalruatkima chuan Zofate inpumkhata kan awm theihna tur atana hmalakna nasa tak ZORO in an nei hi a lawmawm takzet a ti a. Pathianin Zofate hi hnam anga dinchhuah tir a, leilung hausakna a la thuhruk pawh a neitu tura a tih te hi a la phawrhchhuah tir ngei ang tiin chumi tur erawh chuan Zofate hi inlungrual a, hrui khat vuanin, hnam dangte mit hmuhah pawh hnam inlungrual kan ni tih lantir a ngai, a ti a. Hnam inpumkhat leh inlungrual kan nih zel theih nan ZORO hmalakna hi kan thlawp a, a tul anga kan lo tawiawm hi a pawimawh hle a ni, a ti.

Zo hnam chi hrang hrangte hmun hrang hrangah awm darh mahila kan inhre reng a, kan inngaihsak thin tih sawiin Minister chuan tun hnaia Zohnahthlak unaute buaina tawh chungchangah pawh Mizorama raltlan te sawrkar leh tlawmngaipawl hrang hrang ten an lo tuamhlawm a; Manipur atanga raltlan, UPSC exam hmachhawn tur te tan pawh Aizawl Centre a thlamuang taka an exam theih nan ruahmanna siam sak an ni, a ti. Pu Lalruatkima chuan Mizo hnamzia tlawmngaihna chawi nungtu tlawmngai pawl hrang hrang – YMA, MZP, MUP, MHIP, MSU leh pawl dang te chungchang pawh a sawi lang a. Heng pawl ropui tak tak kan neih te hian, manganna leh harsatna kan tawhin min ngaihsak a, kan hnam hmasawnna turin hma an la a, hengte zawng zawng hi Zofate min tipumkhattu leh ti tangrualtu a ni, a ti. Zofate identity chu rinawmna, huaisenna leh tlawmngaihna a ni a, khawi hmunah pawh awm ila, kan hnam rohlu vawng nung zel tur hian Zohnahthlak zawng zawng ten mawh kan phur a ni, khuallian chuan a ti a. Zofate inpumkhat nan theih tawp chhuah a, ralthuam chelek loa kan thiamna leh finna hmanga tanlak zel a tul tih sawiin I&PR Minister Pu Lalruatkima chuan kan hnam a boral loh nan kan zavaiin kan pawimawh a ni tih hre thar leh theuh turin mipuite a chah a ni.

ZORO hi Zofa thendarha awm tawhte insuihkhawm leh rorelna pakhat hnuaia awm tura beitu a ni a. May 19-21, 1988 khan 1st World Zo Convention chu Champhai khawpuiah an lo huaihawt tawh a. He khawmpuia palai kal te khan ‘Zo’ tih chu hnam pumpui kohna atan an pawm tlang a, Zofa then darha awm tawh te insuihkhawm leha rorelna pakhat hnuaia awm tura beih chu lungrual takin an pass a ni. ZORO hruaitute hian ram hrang hrangte dawrin UNO khawmpui hrang hrangah te an lo tel tawh thin a, heng inkhawmpui lianah te hian Zofate inpumkhatna thu hi an au pui a, ziakin vawi tam tak an thlen tawh a ni.

Zofa Inkhawmpui Lian hi ZORO Vice President Pu Rohmingthanga Kawlni chuan a kaihruai a. MUP, MHIP, MSU, MZP leh CYMA aiawh ten thu an sawi a. ZORO President Pu R.Sangkawia pawhin an pawl thiltum leh hmalak tawh dan te, an hnathawh mek te leh hmalak dan tur ruahmanna hrang hrang te chipchiar takin a sawi a ni. Zo hnam chi peng hrang hrang aiawhte hnen atangin chibaibukna thu ngaihthlak a ni bawk.