597/2023-2024

Vawiin khan School Education Minister Pu Lalchhandama Ralte chuan a bial chhung khua a fannaah Mauchar VC House a hawng a, hmar khaw thim zangkhaw bungbut hnan tih thin chu tih enin a awm mek a ni a ti.

Minister chuan Mauchar VC House hawnnaah hian thusawiin hripuiin hnathawk thei lovin kum 2 chhung khawvel a chawk buai a, sorkar sum leh pai a tla chhia a, heti chung hian hmar khaw thim zangkhaw bungbut hnan tihen mek a ni a ti. Hmar thimpui tih enna tur hian kawngpui thar sial leh a awm sa siamthat hna te, tui harsa khuate tan tuilak hnate thawh a ni a. Zirna lamah pawh zirtirtu dah belh leh building sak thar hna te thawh a ni a, zirlai an pung zel a ti. Hriselna lamah pawh thawktu dah belhin thuamthat ngaite thuam that a ni a ti. Manipur nena inkalpawhna leh Bhaga nena inkal pawhna kawngpuite chu zawhfel a nih hunah chuan hmar khaw thim Zoram khaw tawp kha kawtchhuah thar a ni dawn a, he tlangdung hian awmze neiin hma a sawn mek a ni a ti.

School Education Minister hian Mauchar Primary School building-a naupang an len loh avanga hmun danga class kalpuite chu a tlawh a, an mamawhte a hmunah a en nghal a ni.

Minister hian vawiin khan a bial chhunga Upper Sakawrdai khaw hmun thar a tlawh bawk a, school building sakna tur a en kual nghal. Khawtlang hruaitute bulah khaw thang zel tur thlira school building sak dan ruahman a tul thu a sawi a, naupangte infiamna tur thleng pawha ruahman a tul thu a sawi. Pu Lalchhandama Ralte hian Upper Sakawrdai khaw hmun hlui atanga khaw thara an insawn nan chhungkaw engemawzat  chenna in hmun tur a leisak bawk a ni.