598/2023-2024

Aizawl, 26th May 2023: Vawiin khan Tourist Guides’ Federation of India (TGFI) chuan an convention vawi 24-na chu Dawrpui Multipurpose Hall-ah an hmang a. Tourism Minister Pu Robert Romawia Royte chuan khuallian niin he hun hi a hmanpui a, Ministry of Tourism Director General Pi Manisha Saxena chuan khualzahawm niin a hmanpui bawk.

He hunah hian Pu Robert Romawia Royte chuan thu sawiin Tourist Guides’ Federation of India (TGFI) ten Mizorama khawmpui an rawn nei chu a lawmawm hle a ni, a ti a. He khawmpui kaltlang hian zinmi ten Mizoram an hriat phah ngei a beisei thu a sawi bawk a ni.

Minister chuan Tourism Department hmalakna hrang hrang te tarlangin ‘Mizoram Responsible Tourism Policy’ chu India rama a hmasa ber ni turin kum 2020 khan tlangzarh a nih thu a sawi a, he policy hian Tourism-a hmasawnna tluantling leh tlo, ram leilung tichhe lo leh mitin huapzo neih chu a tum ber a ni, a ti. Minister chuan Thenzawl khuaa hmunhma hrang hrang te ‘Virtual Reality’ hmanga chhim theihna tur ‘Thenzawl Calling’ application chu hman theih a nih tawh thu te, zirna in hrang hrangah Ministry of Tourism duhdanin ‘Yuva Tourism Club’ din a nih tawh thu te leh Tourism Department hnuaiah Tour Guide mi 89 an awm tawh thu te a tarlang a. Mizo Tour Guide te TGFI-a an inziahluh ve theih nan TGFI hruaitute chu hmalakpui turin Minister hian a sawm nghal bawk.

Khualzahawm Pi Manisha Saxena pawhin thu sawiin Tourist Guide te chu khualzin te lo chhawn hmasa ber tu an nih avangin ram hmel lanna pawimawh tak an ni, a ti a. India culture-ah mikhualte chu pathian tluka zahna pek (Atithe Devo Bhava) thin an ni tiin, Tourist Guide-te chu he nunphung mawi tak hi vawnghim zel turin a chah a. Khualzahawm chuan Tourism-ah hmasawnna leh harhtharna tam tak a thlen mek thu sawiin, khualzin te duhdan pawh a inthlak ve zel a ni, a ti a. Hmun nuam leh hlu te tlawh mai bakah rammi te nunphung leh ziarang, eitur leh thiamhnang (handicraft) te temchhin (experience) khualzin ten an chak thin thu a sawi a. Tourist Guide te chu he lam kawnga bengvar thar turin a ngen nghal a ni. Khualzin mi ten awlsam zawka Mizoram leh hmarchhak state te an tlawh theih nan inkalpawhna kawng, thlawhna tumhmun leh rel kawng te chu tihhmasawn mek zel an nih thu Pi Manisha Saxena hian a tarlang bawk.

He hunah hian TGFI President Pu Narendra Singh Rathore chuan inlawmna thu a sawi a; TGFI Co-ordinator Pu Ajay Singh chuan lawmthu sawina hun a hmang bawk. Chawhnu lam session-ah Mizoram sawrkara Tourism Joint Secretary Pu V. Lalengmawia chuan ‘Business Promotional Activities from Mizoram Tourism’ tih thupui hmangin thusawina hun a hmang a. Ministry of Tourism atangin Director General Pi Manisha Saxena, Assistant Director General Pu Niraj Saran leh North East Regional Director Pu Anil Oraw ten thupui sawi hawnna (Keynote address) neiin, thupui sawihona hun neih zui nghal a ni.

Tourist Guides’ Federation of India (TGFI) hi kum 1996 khan din a ni a. Tourism leh a kaihhnawih sector-a sawrkar laipui puibawm tur leh India rama tourist guide te hmasawnna ngaihtuah tura din niin, tun dinhmunah hian tour guide 3400 vel member an nei mek a ni.

TGFI Convention hmang tur hian India ram hmun hrang hrang atangin tour guide 132 an fuankhawm a, nimin khan Mizoram rawn thlengin Thenzawl an tlawh nghal a. Naktuk hian Reiek tlang an tlawh ang a, ni 28 hian Lengpui Airport atangin Aizawl an chhuahsan ang.