Vawiin khan Chapchar Kut 2019 chu Sipai Lammual ah “Zofate Inpumkhatna” tih thupui hmangin a Ni khatna lawman hun hman a ni a, Pu R Lalzirliana, Art & Culture Minister chu Kut Pa niin Kut Thlengtu hi Pu B Lalhmingthanga, Secretary, Art & Cultute Department a ni.

Minister Pu R Lalzirliana chuan,”Mizo tih hian chhinlung chhuak hnam hrang hrangte, kan zavai a min tel khawm tu leh a inti neitu apiangte ta a ni a, hemi ti nghet tur leh kan inpumkhatna alo ngheh deuh deuh theih nan kumin Chapchar Kut thupui “Zofate inpumkhatna” ti a vuah a ni nghe nghe a ni,” a ti a,” Ramri kham dan avangte in Tawng leh ziarangte dang hlek hlek mah se kan mizo na a dang chuang lova heng kan tawng leh ziarang hrang hrangte hi Mizo culture ti hausa tu a ni zawk a ni,” a ti bawk. Pu R Lalzirliana chuan Chapchar Kut tobul te tar langin he kut hi inlungrualna leh inpumkhatna hnuaia hmang turin a chah a, ram hmasawn nan a pawimawh hmasaber chu inpumkhatna anih thu sawiin,”Inlungrualna leh inpumkhatna tha nei tur chuan a thlengtute kan pawimawh hle bawk a ni,” a ti. Minister chuan khawvel ah hmasawnna kawng hrang hrangah chak takin a kal lai hian mahni hnam ziarang tlan san palh a hlauhawm thu a sawi a,” Hnam ropui apiangin an hnam ziarang an chawisang thin a, hnam dangte pawhin an lo hmelhriat phawh zawk ta thin a ni,” a ti a,” Kan awmna apiangah kan mizo nunze mawi leh kan hnam rohlu Tlawmngaihna hi kan chhawm nung zel tur a ni” a ti bawk.

Kut Thlengtu Pu B Lalhmingthanga chuan,”Ramin ri a neih angin hnam erawh chuan ri hmuh theih a nei lova, inpumkhatna leh indai dana erawh hi chu kan thinlungin a siam chawp anih avangin kan rilru put hmang a pawimawh hle a ni” a ti a,”’Dam leh tlang khatah, Thih leh ruam khatah’ tia inzirtir hnam leh ‘Sem sem dam dam ei bil thi thi’ tih thuvawn nei kan nih angin kan in unauna sawh nghet sauh sauh a Hnam ropui tak kan nih theih nan Zofate inpumkhatna kawngah tan ila tlang zel ang u”, a ti bawk.

Vawiin Chapchar Kut 2019 lawmna Ni hmasa hi Zing dar 6:00 ah “Chapchar Kut Tlan” in hman tan a ni a, Pu Lalruatkima, I&PR Minister in hmanpuiin Chanmari – Lammual leh Sikulpuikawn – Lammualahte mi enge maw zatin tlannah hian an telpui a Lammual ah hian Dar 11:00 ah hun hman tan niin Mizoram Cultural Organisation ten Hla Do nen hun hawnna an hmang bawk a ni. MHIP General Headquarter ten Siktuithiang Lam entirin mal Zai, Zaipawl leh lam hrang hrang entir a ni bawk a. He kut lawmnaah hian hmun hrang hranga Zohnahthlakte sawm niin Falam, Tidim, Halflong, Tahan, Shillong, Manipur leh Bangladesh atangte in chhimtu an awm bawk a ni.