Mizoram Co-operative Fish Farming Marketing and Processing Federation Ltd. (ZOFISFED) chuan vawiin khan Agriculture Conference Hall-ah ‘Annual General Assembly-cum-Awareness Campaign for Integrated Fish Farming Programme’ an hmang a, Cooperation Minister Pu J.H.Rothuama chu Khuallian a ni. Kumin ZOFISFED Assembly thupui-ah ‘Intodelh nan Cooperative Society kaltlangin Sangha khawi rawh’ tih a ni.

Hawnna inkhawm ZOFISFED Chairman Pu Thangchungnunga kaihhruaiah Khuallian Pu J.H.Rothuama chuan Mizote zingah sangha khawi an pung zel a, phailam atanga lakluh ni lo mahni ramchhung ami ngei sangha tharlam tak mipuiten ei tur kan nei tan tawh a, hei hi kan hriselna atan pawh thil tha tak a ni, a ti. Sorkar-in NLUP hmanga miharsa zawkte tan eizawnna ngelnghet siam a tumna NLUP Programme chu a hlawhtling zel a, chung zingah chuan sangha khawi thlangtute chu a hlawhtling leh hlawkna tel tam pawl an ni a a hriat thu a sawi a. Mizoramin tun hun kan dai chhoh mek hi nakina kan ram leh hnam kal zel dan tur siamtu pawimawh tak a ni dawn tiin Cooperation Minister chuan sorkar tanpuina chauh ring lovin, mimal, pawl leh khawtlang ang pawhin tanrual zel a, inchawm zo leh intodelh nih kan tum theuh tur a ni, a ti.

ZOFISFED hi October ni 29, 1998-a din tan a ni a, a hnuaiah hian Primary Fisheries Cooperative Societies 22 an awm mek a ni. Kum 2008 atang khan ZOFISFED hian Demonstration-cum-Fish Seed Farm 8 a enkawl mek a, chung zinga 3 chu hman mek niin 5 a dangte chu thuamthat tum mek a ni bawk. Kum kalta chhung khan sorkar laipui tanpuina RS.22,52,500/- hmangin Buhchangpui-ah ‘Ice Plant’ (vur siamna hmun) 1 bun a ni a, sangha dah vawh nan ‘Refrigerated Van’ 1 lei a ni bawk. Kumin chhung hian Darlak leh Zawlnuam-ah Ice Plant 2 sak belh te, Refrigerated Van 1 dang lei belh, Ice Box phur thei tur autorickshaw 2 leh motorcycle 1 bakah sangha zawrhna tur dawrte (kiosk) sak nan sorkar laipui chuan cheng nuai 45.956 a pek belh beisei a ni. Scheme for Welfare of Fisherman Saving-cum-Relief Scheme for Fishermen of Mizoram State hnuaiah hian chhungkaw 17,900 ziahluh an ni a. Paddy-cum-Fish Culture hnuaia hian beneficiary 781 tanpui an ni mek bawk. 

ZOFISFED Assembly chawhnu session ah hian kum 2013 - 2018 chhunga Board of Directors thlanna an nei nghal a ni.