Vawiin khan Kolasib DC Pu Lalfela Sailo hovin DAPCC meeting, DC Conference Hall-ah neih a ni a. Kolasib District chhunga HIV AIDS darh zel tur tihrem kawnga hma an lo lak tawhte leh hma thar lak zel dan turte thlir hovin ruahmanna hrang hrangte an siam a ni.

Thuhma sawiin Pu Lalfela Sailo chuan, District AIDS Prevention and Control Committee in AIDS darh zel tur ven hna leh District puma mipui mimir zirtirna kawnga hna an thawh chu tha hle a a hriat thu a sawi a. Tun thlenga an hna thawh hi a ropui a. Hma lam pana kal zel tur kan nih angin tan i la sauh sauh ang u, a ti a ni.

DAPCC Member Secretary Dr. Lalhlimpuia chuan an hmachhawp hrang hrangte tarlangin kum kalta 2012-2013 chhunga an hna thawhte a sawi a. Member ten sawihona hun tha tak an hmang zui a ni.

Kum kalta chhung khan High School leh higher Sec School hrang hrang 41 atangin zirtirtu 113 hnenah Awareness pek a ni a. Kolasib Jail tang zinga HIV + mi 6 te chu Aizawla ART Centre ah hruai thin an ni bawk. February 2013-a Red Ribbon Football Tournament neih chu a hlawhtlin hle thu leh hei hian mi tam tak hnena thisen test duhna a pek avanga test tu pawh an pun chhoh thu tarlan a ni bawk a. Kolasib chu Tournament nei leh tura sawrkar laipuiin a thlan a ni ta bawk a. Heta tana sum ruahman Rs 2,50,000/- chu vawiina Committee hian an pawm nghal a ni.

Kolasib District chhungah thisen test tawh zawng zawng mi 28860 zingah HIV hrik pai mi 381 hmuh chhuah tawh a ni a. Chung zinga 228 chu hmeichhiat mipat atanga kai an ni a. 62 chu Drugs hmansual vanga kai an ni. 17 dang chu nu atanga kai leh 26 chu chhan hriat lohte an ni. 2012- 2013 chhunga thisen Blood Bank a pete zing atangin mi pakhat (1) chu HIV + a ni tih hmuhchhuah a ni bawk a ni.

Attachment

  • Loading attachment...