3160/2022-2023

Champhai, the 29th December, 2022: Law & Judicial Minister, Pu T.J. Lalnuntluanga chuan vawiin chawhma dar 10 khan a chenna In, Champhai Kahrawt Vengah Zokhawthar kaltlanga Myanmar nena insumdawntawnna tihchangtlun dan tur chungchang Champhai District Bawrhsap Pu James Lalrinchhana leh SP Pu Lalrinpuia Varte te a sawipui.

Minister Pu T.J. Lalnuntluanga chuan Pu Zoramthanga kaihhruai Mizoram Sawrkar chuan kum 2019 kum bul lam atangin Indo-Myanmar Border Trade tihchangtlun chungchangah theihtawp chhuahin Land Custom Station chu tichangtlunga Integrated Check Post-a hlangkai turin hma a la nghal a ni, a ti a. Integrated Check Post-ah hian Food Testing Lab, Plant Quarantine Centre, Animal Quarantine Centre or Check Post, Weight Bridge leh hmanraw dang dangte dah tur a ni a, hemi atan hian cheng nuai 1,500 zet Sawrkar laipui atangin hmuh a ni, a ti a. Hei bakah hian Zokhawthar leh Khawmawi inkar Lei (bridge) siam tura ruahman a ni a, hemi chungchanga hmalak dan tur pawh sawiho tul a tih thu a tarlang bawk.

Thukhawm chuan Myanmar tualchhung buaina avanga Myanmar nena insumdawntawnna chawl thuap chu remchangah la a, mumal zawka insumdawntawnna kalpui anih theih nan buaipui tul angte lo inhmakhuaa zirchianna neih tha an ti a. Khawchhak tlangdung mipui leh sumdawngten dan ang taka insumdawntawnna hi an hlawkpui theihna turte, man tlawm zawka nitin mamawh chakkhai leh bungruate kan hmuh theihna turin insumdawntawnna chungchangah ruahmanna felfai zawk neia, hmun danga an lo kalpui tawh dante pawh zirchian tha nia an hriat thu an sawi bawk.

Law & Judicial Minister hian Zokhawthar kaltlanga India leh Myanmar insumdawntawnna tihchangtlunna tur chungchangah hian Mizoram Chief Minister aiawhin Union Ministry of External Affairs (MEA) leh Ministry of Road Transport & Highways changtu Minister-te, MEA Joint Secretary bakah Myanmar Ambassador to India-te pawh hmaichhanah a lo zu dawr tawh a ni.