3159/2022-2023

Aizawl 29th December 2022: Vawiin khan UD&PA Department hmalakna in Mizorama a District Headquarters leh Urban towns hrang hranga bawlhhlawh sawngbawlna chungchang sawihona (consultative meeting) chu UD&PA Directorate ah neih a ni.

Meeting hi Pu Lalmalsawma Pachuau, Secretary, UD&PA in a kaihruai a, Pu H.Lianzela, Director, UD&PA, Pu Lalrothanga, Project Director, SiPMlU, Pu CC Lalchhuangkima, DC Khawzawl leh Saitual, Khawzawl, Serchhip, Mamit leh Hnahthial District DC aiawhte leh UD&PA Department officer pawimawh te an tel a ni.

Pu Lalmalsawma Pachuau chuan Mizoram chu National Green Tribunal in State tam zawk te an bawlhhlawh sawngbawl dan fel tawk lo avanga pawisa tam tak a chawitir laiin Mizoram fine chawitir kan ni ve lo tih thu a sawi a. Chutih rualin District Headquarters leh Urban Towns dang te a Solid Waste Mangement Centre la awm loh naah a rang thei bera din a tul thu a sawi a, funding source pawn Planning Department nena tangkawpin ngaihtuah mek a nih thu a sawi.

Meeting chuan hmalakna awm tur reng reng chu UD&PA Deptt. official te, District officials te leh khawtlang hruaitute in rawn tawn chunga hmalak a tul thu sawi a ni a, bawlhhlawh sawngbawlna sak bakah a sak zawh hnua enkawl dan tur kalphung mumal tak duan a tul thu rel a ni.

Bawlhhlawh sawngbawl nana sum sen ngai tam lutuk thin tih ziaawm nan decentralized waste management zulzuiin, hmun khatah chauh ni lo khaw chhung hmun hrang hrangah sawngbawlna hmun siamdan rang taka ngaihtuah nise tia rel a ni a, DC tin ten an District theuh a bawlhhlawh an generate zat leh eng ang bawlhhlawh nge an generate tih lo zirchiang se, bawlhhlawh tawih thei (wet waste) te chu a tam thei ang ber Home Composting leh Community Composting hmanga lei tha siam nana hman nise tiin rel a ni bawk a, hemi tur hian Department dang te nena mumal taka thawhho dan ruahman nise ti a rel a ni bawk.