4314/2025-2026
Champhai, dated 5th February 2026: Vawiin khan Zokhawthar VC House-ah JJM hnuai tui hniang hnar pek lawmna leh WATSAN Committee kuta hlanna hun 'Jal Arpan Diwas' hman a ni a ni a, Pu James Lalnithanga Addl DC in Khuallian niin a hmanpui.
Khuallian Pu James Lalnithanga chuan Zokhawtharin tui hnianghnar taka hman tur nei a, Sorkarin an mahni enkawltur a pe chu a lawmpui thu sawiin, Hei hi sorkar hmalakna a ni mai lova, khawtlang nena tanrualna tur, inrintawnna keng tel a ni tih an hriat thar a tul hle a ni, a ti a. He project-in a tak ram a chan theihna tura PHE Department hmalakna lawmawm a tih thu sawiin, Zokhawthar chu Mizorama tlawhtu ngah berte zinga mi a ni a. Tui thianghlim a neih hi a tul mai ni lovin Mizoram hmel tihlanna a ni tel a. India ram anga ngaihtuah pawhin kan ramin inrelbawlna tha a nei tih lantirtu a ni tel nghal, tih a sawi. Khuallian chuan PHE Deparment hmalakna hian Zokhawthar khawtlang tan hriselna a thlen ngei a beisei thu sawiin, tui atanga natna kai thinte a ziaawmin khawtlang nun pumpui chawikang se a duh thu a sawi a. A enkawl zui kawngah Department aiin khawtlang kutah a innghat thui zawk dawn a. Zokhawthar khawtlang chu a vawnhim leh enkawl kawngah te, tui renchemna lamah te tan la zel turin a sawm a ni.
He hun hi Pu Laldinthara VCP Zokhawthar chuan a kaihruai a. Pu C. Zothansanga SDO, PHED hnen atangin Technical Report ngaihthlak a ni a, Pu Kaleba Lalhruaizela JE PHED in 'Meri Panchayat Mobile Application' hman dan mipuite zirtirna neiin Water Quality & Field Testing Kit hman dan Pu Kamkhanliana, Bacteriologist, PHED chuan a nei bawk a ni.
He hunah hian Pu C. Zothansanga SDO PHED in VCP kutah Village WATSAN Committee hman turin tuilakna document pawimawh hrang hrang leh tui lak enkawlna hna a hlan nghal bawk.
Pi F. Lalzarliani kaihruaina in tui humhalh tur leh khawlkhawm tura thutiam lak niin Pu Lalhmangaiha Pautu JE PHED chuan lawmthusawiin hun a khar a ni.
