4313/2025-2026

Siaha, 5th February 2026 : Vawiin chawhma dar 11:00AM khan DRDO Conference hall, DC Complex Siahaah Siaha district chhunga Registrar of births and deaths-te tan 'Annual Meeting' leh Training neih a ni a, Pu Abraham Beirazi Khithie, Additional DC, Siaha chuan khuallian niin a hmanpui.

Thu sawiin khuallian Pu Abraham Beirazi Khithie chuan annual meeting leh training nei tura kalkhawm zawng zawngte chu inzir tharna hun remchang an neih avanga a lawmpui thu sawiin training neih fo hian mi a tihphur thar a, inrintawkna min siamsakin kan hnaah min titui thin a ni ti. Tunlai thiamna (information technology) thang chak takah hian hnathawktute chu khawl thilte ral thlirtu ni mai lova khawvel hmasawnna ruala inzir thar reng tura fuihin, tunlai khawl mila kal loh chuan mahni hna ngaia neihna leh ninna a thlen thei a, chu chuan thawhhonaah leh hnaah rah tha a chhuah thei lo a ti.

Registrar of births and deaths- hnathawh pawimawh tak zinga pakhat chu birth certificate pekchhuah anih thu khuallian hian sawiin, sawrkar-in lehkha pawimawh a pekchhuah tur zawng zawng hian a tifiahtu atan birth certificate phut thin a ni fo a, lehkha pawimawh zawng zawng innghahna bulpui tiin a sawi theih; chuvangin dik leh felfai taka chhinchhiah a pechhuak turin Registrar of births and death kalkhawmte a chah bawk.

Vawiina hun hman hi Pu H. Ramhluna, MPE&ES, District Addl. Registrar leh District Research Officer, Siaha nibawk chuan a kaihruai a, Siaha district chhunga Registrar of births and death bakah Kohhrang aiawh, VC aiawh leh tlawmngai pawl aiawh an tel a. Pu J. Lalramdinmawia, IS RBD (DES) leh Pu H. Lalruatkima, FAS ten kalkhawmte an zirtir a, zawhna leh chhanna hun hman anih bakah sawihona hun hman a ni a. Pu JF. Vantawna, IS, DRO Office, Siaha-in lawmthu sawina a nei a, hun hman tihtawp a ni.