3864/2023-2024

Dated Aizawl, the 16th February, 2024: Zanin dar 8 khan Vaivakawn Cultural Centre ah Zonet Cable TV te chuan an lo tih tawh thin angin Mizoram Civil Services (Combined) Competitive Examination 2023 a tling te lawmpuina hun a buatsaih a. Chief Minister Pu Lalduhoma chu khuallian a ni.

Lawmpuina thuziakte a hlan zawhah thusawiin Chief Minister chuan, officer tling tharte a lawmpui a, Pathian tih chunga an hnate thawk tura chahin, officer inngaitlawm ten an chetziain mipuite thinlungah thu ropui tak a sawi thin. Hmun hrang hranga insawn kual te a tul fova, chhel tak leh taima taka awm a ngai a, inenkawl fel thin mi nih pawh a pawimawh hle. Kan hnate hi hna nuam leh awlsam lam a ni vek ngai lova hun harsa leh khirh tak tak a tam thin hle zawk a ni. Tin, mahni eizawnna lam thawk mumal hman lo khawpa pawl danga inhman vak vak te hi a tha lo tak zet a ni. Kawng dik lo chu a zawhtu an tam vang maiin a lo dik ta tihna a ni ngai lo, chuvang chuan a hunah chuan "No Sir" tih a tul chang a awm thin. Dikna lo dinpui ngam ula, in dik chuan in huai dawn a ni, a ti. Mizoram state hi kum 40 a tling dawn tawh a, state dangah han zinchhuak ila, kan lo la hnufum bikzia hi a lo chiang thin. Nang leh kei hi he ram siamtha tura koh kan ni a, politic atanga tih chi a awm a, official atanga tih tur chi a awm bawk a. Mahni zawnah theuh kan ram tana kan thawh a tul a ni, tiin officer tharte chu ram tana an theihna hmang turin a chah a ni.

He hunah hian Rev R. Vanlalnghaka, MKHC Chairman, Synod Moderator chuan hunserh a hmang a ni.