Vawiin Khan Kolasib-a Paradise Restaurant-ah Zoom Kolasib buatsaihin Photographic Workshop neih a ni a, Kolasib District chhunga thlalak lama tui mi 30 rual an kalkhawm a ni.

Workshop hi Pi Lallianpuii, DIPRO chuan a hawng a. Hawnna thu sawiin Photography chu Art ropui tak, rilru leh ngaihtuahna thianghlim tak nena tih chi a ni, a ti a. Kolasib District chhunga hetiang pawl alo ding ta mai hi District tana hmasawnna kailawn ropui tak a ni a tia, thlalaka tui mi zingah rilru kawi leh bawlhhlawh tak a awm theih loh a rin thu pawh sawi a. Kolasib-a thlalatute chu Zoram leh ram pawn thleng pawha la in pho chhuak deuh deuh tura a beisei thu a sawi a ni.

Workshop-ah hian Dr. Saihlira, DVO chuan Basics of Photography chungchang sawiin zirtirna a pe a. Pu Stephen Laltlansanga Auhmun chuan Ethics of Photography chungchangah zirtirna a pe bawk. Pu Marema Ralte, Remtluang Pictures chuan Printing & Processing tih thupui hmangin zirtirna a pe bawk a ni. Thupui then hrang hrang ngaihthlak hnuah te hian zawhna leh chhanna hun hmangin sawihona tha tak neih zel a ni. Puipunna mithi In leh Inneih nikhuaa thlalatute tihawma mawi leh mawi lote he hunah hian sawi a ni bawk a. Mawilo leh Pathian Biakin zahawmna ti nep thei khawpa thlalatu vei sek leh uchuak taka lo inrawlh sek te tha an tih loh thu pawh an sawi a ni.

Pu Isaac Lalthanmama, President, Zoom Kolasib chuan Workshop hi a kaihruai a. Tlai lamah member zawng zawngte an Camera theuh kengin khawlaiah an feh chhuak a, hetah hian thlalak hmeh nga theuh hmetin hei hi an theh lut vek a. Computer-ah dahlutin Projector hmangin an thlir ho leh a ni. Heta Camera thehluhte hi print chhuakin remchang hmasa berah mipui a duh apiang thlir theih turin khawlaiah an la pholang dawn a ni.