Zanin khan Panchayat Bhawan, Bairabi North-ah Zophai ramri buaina changchanga ramria duty Sawrkara thuneitute leh All NGO, Bairabi-ten thutkhawmna an nei a, Pu Lalhuliana Fanai, IPS, DIG (NR), Pu Lalthafamkima Jongte, AIG (Ops) leh Kolasib district-a official-te an tel bawk a ni.

Hun kaihruaitu Dr.H.Lalthlangliana, Kolasib district bawrhsap chuan ramri chungchangah sawrkar lam thuneitu, a hmun a duty-te thu ngaihchan thiam leh an thu zawm a pawimawh hmasak thu a sawi a, ramria hmalakna chu ngaihtuahna fim tak nen ruahmanna kalpui a tul thu a sawi. Hmalakna kalpui dan ah hian nakin hun a ramri hauhna kawng a hmalakna ngelnghet zawk a thlen theihna turin ngaihtuahna sen tel a tul thu a sawi a, Bairabi NGO-te thahnemngaihna leh inpeknaah lawmthu a sawi bawk a ni.

Pu Lalhuliana Fanai, IPS, DIG (NR) pawhin thu sawiin engpawh hmachhawn thei turin an inpeih reng thu a sawi a, nunna thap ngai a nih pawhin Mizo thalaite inhuam ang bawkin Mizoram police-te chu an inhuam reng thu a sawi a, an hna a nih angin hemi kawngah hian Police duty-te chu ring ngam turin Bairabi NGO aiawha lo kalte chu a chah bawk a ni. Awmze nei lova hmalakna chuan chhiatna duhawm loh zawk a thlen phah theih avangin awmze nei ruahmanna a awm theih nan ngun tak a ngaihtuahna sen a ngaih thu a sawi bawk a ni. Pu Lalthafamkima Jongte, AIG chuan sawrkar ruahmanna a hlawhtlin theih nan thawktute chungah rinna nghat ngam turin kalkhawmte a chah bawk a ni.

Pu R.Lalfakawma, VCP, Bairabi North chuan Zophaia ramri ven nana hmalaknate tarlangin mahni ramri chin ve veah Police duty awm tir vat chu ramri venhimna kawng a mamawh hmasa a nih thu a sawi. Bairabia NGO hrang hrang aiawhte chuan an ngaihdan sawina hunte neiin ramri hnaih a leilette chu hnamdang enkawlna hnuai a awm tawh lovin changtlung zawk a chei that thuai a tul thu leh ramria sawrkar hmalakna chu an thlithlai reng tur thu an tarlang ve bawk a ni.

Vawiin khan Sawrkar leh Jt. VC, Bairabi tangkawp hmalaknain Ramri lui thleng a lirthei lut thei turin kawng laih tlang a ni a, a tul laiah te hume pipe phum a ni. Chawhnu lam khan hume pipe phum hna chu Assam Police-te chuan an chawlh lailawk tir a, a tul angin Assam lam official-te biak niin he thu buatsaih lai hian an tawlh kir leh tawh a hume pipe pawh phum chhunzawm a nih thu dawn a ni.