2463/2022-2023
Champhai, the 28th October, 2022: Central Young Mizo Association (CYMA) leh Mizoram State AIDS Control Society (MSACS) te bultuma HIV/AIDS hluar zel tur dona kawnga hmalakna, 'Zoram Harh Rawh Campaign' tih thupui kaltlanga Branch YMA te tana Mizo hnam lam, hnam hla leh hla phuah hmanga intihsiakna neih dan tur chungchang District-a buatsaihtu, Champhai District Level Organising Committee on Zoram Harh Rawh Campaign member-te pualin vawiin chawhma dar 11 khan HIV/AIDS chungchang inzirtirna leh hmalak dan tur sawihona HIV/AIDS Advocacy Program buatsaih a ni.

He hun I&PR Conference Hall, CHANEM Building-a buatsaih hmanpuitu Champhai District Bawrhsap Pu James Lalrinchhana, District AIDS Prevention and Control Committee (DAPCC) Chairman ni bawk chuan hlawhtling taka HIV/AIDS dona 'Zoram Harh Rawh Campaign' kalpui turin a buaipuitute'n an hriatfiah hmasak a tul thu sawiin, member-te tana inzirtirna hun tha tak buatsaih a ni chu lawmawm a ti a. Ruihhlo khawih leh natna inkawichhawn theihte a inkungkaih tlat thu leh do tlan zel a tul thu sawiin, ramri dep Champhai District-ah tha thlah lova tanrual a ngaih thu a sawi a. Kalkhawmte chu zirtirnate ngun taka ngaithlaa midangte zirtir chhawngtu nih tum theuh turin a sawm a ni.

He hunah hian District AIDS Control Officer Dr. Vanzarliani, SMO pawhin thu a sawi a. Pu Lalchhuanawma, M&E, DAPCU-in kalkhawmte zirtirna a pe a. Kalkhawmte chu HIV/AIDS chungchanga District dinhmunte hrilhhriat an ni a; engtia hmalakho tur nge tih zirhona neih a ni. Tarlan a nih danin Undivided Champhai District-ah kumin January atanga September thla chhung khan a nawlpuia HIV test 3,814 atangin mi 144, za zela 3.77 (3.77%) te an positive tih hmuh chhuah a ni a, naupai test mi 2,875 atangin 21, za zela 0.73 (0.73%) ten HIV an kai tih hmuhchhuah a ni a. HIV kaina tam ber chu sex atangin a ni a, syringe thianghlim lo inhman tawmin a dawt a ni. ART a inziaklut mi 2,014 awm tling tawhin, mi 1,197 ten an la mek a, OST la mek Champhaiah 694 leh Khawzawlah 453 an awm bawk a ni.

Zoram Harh Rawh Campaign intihsiakna hi District Level-ah November ni 15-19,2022 chhunga neih tum niin, Mizo hnam lam, hnam hla leh hla inphuahsiak hmanga inelna neih a ni dawn a. He huna telte tan hian HIV/AIDS Awareness Campaign leh mahni inhrechiang duhte tan thisen test neih thin a ni bawk ang a, media lamahte inzirtirna kalpui thin a ni bawk ang.

District level-a tithate tan State level intihsiakna December ni 1, 2022 hian neih tura ruahman a ni a. District bikah hian pakhatnain Rs 50,000/-, pahnihnain Rs 30,000/- leh pathumnain Rs 10,000/- te an dawng dawn a. Heng bakah hian Branch 2 tan Consolation Prize Rs. 5,000/- leh a tel dangte participation prize Rs. 1,000/- sem an ni bawk ang.

Zoram Harh Rawh Campaign-in a tum ber chu mipuite HIV/AIDS chungchang ngun taka zirtir a ni a. HIV laka inven dan leh inven nachang an lo hriata kan rama HIV a darh zel loh nana ruahman a ni a. Heng bakah hian a vei mekte'n enkawlna tha dawn a pawimawhzia an hriata, inenkawlna dawng tura inenkawlna hmun pan nachang an hriat theih nan te, HIV kai thei dinhmuna dingte'n an dinhmun dik tak an hriat theih nana thisen test-na hmun kawhhmuh leh mahni dinhmun inhriatchian pawimawhna leh thatnate zirtir a ni.