Mizoram tih hmasawnna tura Project duan leh hnathawh chi hrang hrangte engemaw avanga tih khawtlai leh sukuk te thlirin vawiin khan Special Project Monitoring Committee chu an chairman Pu Zodintluanga, UD & PA Minister hovin New Secretariat Conference Hall-ah an thukhawm.
Minister hova meeting hian Department hrang hrang ten Non Lapesable Central Pool of Resources (NLCPR), North Eastern Council (NEC), Special Project Assistance (SPA) leh TFC hnuaia sumfai hmanga hna an thawhte an thlir hova. Tun dinhmunah Project 53 chhan hrang hrang avanga a nih tur leh ruahman anga kaltluang thei rih lo an awm a, heng project tangkhangte hi an kal tluan loh chhan meeting hian thlir hovin eng kawnga hma lakpui tur nge tih te an rel a. Ruahmanna chhawpchhuah mek Detailed Project Report (DPR) la peihfel loh Project 30 chuang meeting hian an en ho bawk a ni. Project thenkhat chu hnathawh tan tawh instalment dang la thlen loh vanga chhunzawm rem mailo te, Technical thil felloh vanga chawlh lailawk te, Contractor la thlan felloh vang te, Utilisation Certificate la peihfel loh avanga khaihlak leh hna la tan loh hrim hrim te an ni hlawm a. Heng Project pawimawh tak takte hi chak zawka thawh leh chhunzawm a nih theih nan Committee hian hmalakpui dan tur an duang nghal a ni.
Vawiina Special Project Monitoring Committee hi din a nih atanga an thutkhawm vawi khatna a ni a. Kumin March 16 khan Committee dinna sawrkar Order chu tihchhuah a ni a. Chairman-ah Pu Zodintluanga UD & PA Minister a ni a, Vice Chairman-ah Chief Secretary Pu Lalmalsawma, IAS niin Member Secretary –ah Dr. C. Vanlalramsanga, Secretary, Planning a ni.
Vawiina meeting-ah hian Department hrang hranga hemi hnuaia Project thawktute an kal khawm a ni.
Special Project Monitoring Committee hi Project hnathawh sukuk leh khaihlak en thlithlai tura din a niin, sum rang zawka hmuh a nih theih dan tur te, chhan chi hrang eng engemaw ram lei leh lak avanga buaina awm thei leh harsatna dang sukiang tura hma la tura duan a ni a, a theih chin chinah ram leh mipui chhawr tura hna thawhte a vil dawn a ni.
