Mizoram chhimlam fanga zin chhuak, Chief Minister Pu Lal Thanhawla chuan nizan khan Saiha thlengin, tukin zinga amah leh a zuitute lawmna vantlang inkhawm Saiha Bazar Traffic Point a buatsaih-ah, ‘Mizoram mipuite hi Zoram khua leh tui vek kan ni a, sorkarah kan chanvo a inang vek a ni’ a ti.

Chief Minister chuan Democracy ah mitinin zalenna thui tak kan nei a, Mara Autonomous District Council (MADC) in inthlanna an hmachhawn mekah zalenna an neih chu ringtu vek an nih angin, rilru fim tak leh chhia leh tha hriatna fimkhur taka hmang turin a chah a.Politics hi inleina tur emaw in vauna tur emaw a nilova, Pathianin a rawngbawl tura hmanruaa a dah a ni a ti a. Eng hna pawh thawk ila, Pathianin a rawngbawl tura min dahna a ni tih hriain, ringtu kan nih angin rinawmnate, diknate, felna leh thianghlimna nen kan thawk mai tur a ni a ti. Chuvangin kan thil tih reng reng hi Pathian lam tang programme a ni tur a ni a ti.

Mizote zingah rethei leh hausa inkar zau ta lutuk siam that nan, a sorkar chuan miretheite chhanchhuah hna NLUP hmangin chak takin hma ala chho mek a ni a ti a. An hun hmasa a NLUP din chhuahpui tam tak an awm thu sawiin, tunah pawh hian chutiang hlawhtlinna chu a dawngtute taimaknaahte, rinawmnate leh diknaah te bawk a innghat thui hle a ni a ti a. Sorkar ang chuan a hlawhtling tawh a ni a ti. Sum hi a dawngtu tur nilo,midang ten an lo it ve a thianglo a ni a ti. Kum 5 chhunga chhungkua nuai 1 leh sing 2 hnenah eizawnna ngelnghet bul tan nan pek kim vek an ni ang tiin, sum pawhin a daih vek dawn a ni a ti.

Thalaite tan sorkarin khawvel thar a siam sak mek thu sawiin, khawtlang hruaitu tha ni tura kan chher hi a tul a ni tih kan hria a. Sports lamah phak tawk ang zela hmalak chhoh mek zel anih thu sawiin, zirna lamah pawh export quality chherchhuak turin NIT leh IIMC te kan nei tawh a ni a ti a. Heng bakah hian zirna In sang zawk tam tak neih belh zel tura tan lak zel a ni a ti. Central Civil Service-ah te tam zawk an luh theih nan kawng kawhhmuhtu tur Youth Commission din a nih tawh thu leh sipaia awlsam zawka an luh theih nan Sainik School pawh Chhingchhipah peih fel tep a ni, a ti.

Hmasawnna bulthut pawimawh tak, power tam zawk kan neih theih nan kan lui tuite hi power siamchhuah nan khuah vek tum a ni a ti a. Kuttling lova sum hmuh tum avanga hlamchhiah tak, Tuirial Hydel Project kha puitling ta se, eng ah na na chuan kan intodelh tawh ang a ti a.Tunah hian hna chhunzawm chhoh leh mek a ni tiin, kum 2014 ah commission theih a beisei awm a ni, a ti. Mizoram a eirukna tihbo kawngah a zung phawi tawh a ni tiin, phoro chiah erawh ala nilo a ni a ti a. A nuaibo tur hian Zoram leilung fa te hian a mawh kan phur vek a ni a ti. Intodelh chungchangah, kan ram leilung haichhuah hna thawh mek anih thu sawiin, ei leh bar kawngah Chief Minister chuan thla hnih chhung daih pawh kan tharchhuak lo a, hei hian taimakna min zirtirtu ni thei se a duhawm hle a ni a ti.

Chief Minister chuan Aunomous District Councilte hi an sorkar apianga thuneihna sang zawk an pek thin thu sawiin,Direct Funding an dil pawh a sorkar chuan an thlawp anga centralah recommendation an thehluh pawh central sorkar chuan a pawmpui tawh a ni, a ti. Saiha Civil Hospital chu district hospital tha bera siam tum anih thu Chief Minister hian sawilangin, Nursing School pawh dah tum a ni a, sum pawh a awm vek tawh a ni a ti.

Chief Minister hi a nupui Pi Lal Riliani bakah Cabinet Minister 5, Parliamentary Secretaries leh MLA 8 ten an tawiawm a. Naktukah Lawngtlaiah riakin vantlang inkhawm ah a tel leh ang.