Pu Zodintluanga, Minister i/c Sports & Youth Services etc chuan vawiin chawhma dar 11:00AM ah khan 7th MFA U-19 (Junior) Inter District Football Tournament 2012 a hawng. He Football Tournament hawnna hi CYLA Playground, Lawngtlaiah hman niin Pu C. Ngunlianchunga, CEM, LADC leh Pu B. Lalhmingthanga, DC, Lawngtlai te, Lawngtlai District chhunga Sorkar mi pawimawh te leh MFA Official ten an hmanpui bawk.

Sports Minister Pu Zodintluanga chuan infiam mi kalkhawmte fuihin infiamna hi eizawnna tling a nih thu a sawi a, infiam miten tih tak takna neia theihtawp an chhuah chuan hlawhtlinna a awm a ni a ti a. Mizoram Sorkarin infiamna lamah hmasawn turin nasa takin hma a la a, thalaite’n a phu tawka an chhan let a ngai tih a sawi a. Lawngtlai District chhungah pawh infiamna hmanrua leh khelmualte tih changtlun zel tum a nih thu sawiin Dokulha Hall pawh contact sports khelh theihna turin chei that a ni ang a ti a ni.

7th MFA U-19 (Junior) Inter District Football Tournament hi ni 10-16 April, 2012 chhunga khelh tur a ruahman niin Mizoram chhunga District paruk (6) - Aizawl, Lunglei, Saiha, Lawngtlai, Mamit leh Serchhip atangte in District aiawh team an rawn tel a. Pool A ah Lawngtlai, Lunglei leh Serchhip te awmin Pool B ah Aizawl, Saiha leh Mamit te an awm a. Tournament hi Lawngtlai District Football Association (LDFA) in thlengin main sponsor atan Idea Company hman an ni a, Lawngtlaia commercial bank hrang hrangten mimal lawmman an tum dawn bakah MFA in pawisa fai Rs. 70,000/- in a tanpui bawk a ni.