No.917/2020-2020

Health Minister Dr. R. Lalthangliana chuan Zoram Medical College-a COVID-19 natna avanga enkawl mek chu a sample test a negative vek tawh hnuah amah pawh a taksa in hma a sawn zel a, harsatna engmah a neih tawh loh avangin a dam fel tawh a ngaih a ni a. Naktuk hian ZMC damdawiin atangin chhuah tir a ni tawh dawn tih a sawi a, Mizoram chhung leh pawna mi tam takin an tawngtai sakna avang leh ZMC a amah enkawltu daktawr, nurse leh damdawiin staff zawng zawngte thawhrim rah a ni, a ti a. Hetih rual hian mipuite chu sawrkar thupek zawma fimkhur turin a chah a, social distancing zawm that leh kut silfai ngun te bakah sawrkarin dan zawm tur a chhuahte zawm tha hram hram turin a chah bawk a ni.

Health Minister chuan Kolkata Mizoram House-a awm COVID-19 vei hlauhthawn thila Quarantine Facilities a dah mi 17 te sample test result pawh vawiinah chhuakin an vai hian a negative vek a ni, a ti a. A hma a sample test result pahnih negative nen an vain mi 19 test result a negative tak thu a sawi.

Mumbai Mizoram House dinhmun pawh tarlangin cancer vei damlo pakhat leh House thawk hnamdang mi pakhat positive case neih mek te bak midang zawng chu an negative vek tawh tih a sawi a ni.