Vawiin chawhnu dar 2.00 khan Young Women Christian Association (YWCA) chuan Synod Conference Hall-ah silver jubilee an lawm a; he hun hi Chief Minister Pu Lal Thanhawla te nupa chuan an hmanpui a ni.

Chief Minister Pu Lal Thanhawla chuan, “Zoram siamtha tur hian inchhungkhur atanga bul tan a tul a, nu leh paten mawhphurhna kan neih rualin nu hi in pawimawh lehzual a ni. Rilru leh taksa thianghlimna te, khawlai vawnfai chungchangah pawh thangtharte zilhhautu tur chu nu te in ni” a ti. Chief Minister chuan corruption chungchang sawiin, mahni thawhchhuaha inhnangfak thei ten sum lakluh belhna kan zawn chiam avangin sum ngainatna bawihah kan tlulut ang tih a hlauhawm tih a sawi lang a. Zoram siamtha tur hian indem mai lova a chhelai siamtha tura tanrual a pawimawh thu YWCA palaite a chah bawk.

YWCA hian silver jubilee pualin lehkhabu an buatsaih a, Chief Minister Pu Lal Thanhawla chuan a tlangzarh nghal a ni. Vawiina inkhawm YWCA of Aizawl President Pi Boichhingpui’n a kaihruai a ni.