Mizoram Sericulture Service Association (MSSA) chuan vawiin khan Directorate of Sericulture Conference Hall-ah General Confrerence an hmang a, Sericulture Minister Pu Nihar Kanti Chakma-in conference kharna hun a hmanpui a ni.

MSSA Vice-President Pu Lalrinmawia kaihhruai Conference kharna inkhawmah Pu NK Chakma chuan Sericulture Department-a officers leh staff te hnathawk a fak a, service-ah harsatna nei lo leh kalphung felfai ber te zing ami anih avangin a lawmawm hle a ni, a ti. Mizoram-a sericulture hmanga eizawng an tlem mai bakah silk siamchhuah lamah harsatna an la tawh reng hi a pawi tiin Minister chuan farmers te chu tun aia nasain tanpui leh hrilhhriat a tul a ni tiin a chah bawk. Minister hian MSSA member pension ta mi 4 te chu ngaihhrui thilpek a hlan bawk a ni.

Vawiin General Conference-ah hian MSSA hruaitu thar tur thlanna neih nghal a ni a, 2012 chhunga MSSA O.B. turte chu : Pu C. Hrangzawna, Pu K.C. Lalpianthanga, Pi Lalmuansangi, Pu Vanlalmuana, Pu Lalrinmawia, Pu J. Lalthankima leh Pu Lalbiakthanga te an ni. MSSA General Conference 2011 Agenda an ngaihtuah zingah - Lunglei Eri Grainage Centre siam emaw hawn ni se; District tina Ministerial Staff indaih lohnate, a tul anga siam rem ni se; Technical staff te hnathawhna hmanrua tunhmaa an dawn thin angte dawn leh ni se; Sericulture Department hi Mulberry leh Non-Mulberry Sector-ah te then ni se; Cocoon tharchhuah a pun theih nan Circle lam thawktute tanlak tharna tur leh infuih tharna neih ni rawh se tih leh Sericulture Training Institute, Zemabawk-ah hian training zirtirna nei turin Subject Matter Specialist (SMS) post siam ni se tih te a ni.

MSSA hian member-ah technical staff 147 leh non-technical staff 11 a nei a. Kum 2011 chhungin MSSA hmalakna avangin Demonstartor 4 chu Farm Manager post-ah hlankai an ni a, M/R Demonstrator 2 regularise an ni bawk a, Compassionate ground-in mi 4 hna pek an ni bawk.

Nikum MSSA General Conference-in a pawm tak leh a bawhzui - Mamit hmuna District Sericulture Office hawn tih leh Extension Officer post chu Gazetted status pek tih te chu kumin chhung khan an hlawhtlinpui ve ve bawk a ni. Heng bakah hian District Sericulture Officer post 4 siam belh a ni a, Zemabawk-a Sericulture Department ram chungchang tihfel a nih bakah an department website thar www.serimizoram.co.in hawn a ni bawk a ni.