2394/2022-2023
Date 21.10.2022 : Vawiin khan Sport Minister Pu Robert Romawia Royte-in a office chamber-ah Pu Zoramthanga lehkhabu ziah, Zoram zalên nân hming ka sign a tlangzarh.

Information & Communication Technology Minister Pu Robert Romawia Royte chuan thu sawiin tunhma chuan chanchin bu atang te, lehkhabu kan chhiar atangte, TV leh Radio atang tein hriatna dik leh thu belhchiandawl kan hre thin a. Tunah erawh chuan social media hmangin thu belhchiandawl lo tam tak kan hre ta a, chuvangin lehkha chhiarah kan kir leh a ngai takzet a ni a ti. Mizoten Independent kan sualna atana hming sign-tu ngeiin hnam rilru leh ram hmangaihna rilru pua ama tawn hriat ngei lehkhabu a ziak hi a hluin a lawmawm tak zet a ni a ti. Hnam fing leh puitling apiangin hnam movement-a inhmangte an dahsangin an hlut a. Chutiang chuan Mizote pawhin hnam puitling leh fing zia zira kan ram leh hnam hmangaihna dik tak nen hnam movement avanga nunna hlu tak hlantute zah a, a la damte ngaihglut nachang kan hriat a tul a ni a ti. Lehkhabu hmanga kan mi duhsakte finna leh thiltha inhlan chhawn uar zel turin kal khawmte a chah a ni.

Pi Lalbiakdiki, Pu Laldenga (L) nupui pawhin thu sawiin lehkhabu ziaktu Pu Zoramthanga chu MNF dinnaa a sulsutute zinga mi niin, ama tawn hriat ngei lehkhabua a buatsaih thei chu lawmawm a tih thu a sawi a ni.

Lehkhabu tlangzarh inkhawm hi Lalmuanpuia, Chhinga Veng Local Council member-in a kaihruai a. Rev. P.C.Rohlira'n hun serh hmangin lehkhabu thlir lawkna Pu RC Lalramthanga'n a hmang a. He inkhawmah hian Pu H.Biakzaua, MLA & Vice Chairman, Agriculture Development Board, Er. H.Lalzirliana, MLA & Vice Chairman, Road Infrastructure Development Board leh sawm bikte an tel a ni.