2393/2022-2023
Lunglei the 21st October, 2022 - Mizoram Youth Commission (MYC) buatsaih 'Livelihood Generation for Returned Migrant Workers due to COVID-19'hnuaia Lungleia Cement mistiri leh food processing training chhuak mi 48 te hnenah vawiin khan Lunglei DC Conference Hall-ah MYC Chairman Dr Vanlaltanpuia'n Certificate a hlan a ni.

Mizoram Youth Commission Chairman Dr Vanlaltanpuia chuan Skill training hlawhtling taka zir chhuak te a lawmpui takzet thu sawiin an thiam thil zir thar te chu tangkai taka hmang chhunzawm ngei turin a chah a ni.

Mizo thalaite hawizau zela, National level chona va man phak ve tura kawng kawhhmuh zel MYC chuan a tum thu sawiin Super IAS 40 leh competitive exam coaching-te mai bakah cement mistiri training, food processing training, cake baking training, cabin crew, Army Pre-Recruitment training, music leh sports lamah te hmalakna kal mekin heng hmalaknte hi zau zawka kalpui zel tum anih thu a sawi. Thalaite hmasawnna tura hmalakna hrang hrang – competitive coaching, Information Technology, skill development leh entrepreneurship-te hmalakna kalpuina tur MYC Incubation Centre, Serkawn Lena Stadium bula ruahman tur pawh hna bultan thuai tum anih thu a sawi.

Skill training hi kumin February ah bultan niin batch pathum (3) tan training buatsaih a ni a. Mi 21 in Cement mistiri training zo in, mi 27 in food processing training an zo bawk a ni. Cement mistiri training hi ni 30 kalpui niin food processing hi ni 7 chhung kalpui a ni. Trainees te hian an training chhungin nitin cheng 250 stipend an dawn bakah an training zawh hian hmanraw hrang hrang an dawng bawk a ni. Cement mistiri training te hian Dial Rod bending tools, trowel, level pipe, measuring tape, plump bob, spirit level leh tool bag te an dawng a. Food processing trainees te hian cast iron frying pan 5 kgs, steel plates, manual juicer, poly pouch sealer, food grade poly pouch, foid grade pet bottle te an dawng a ni.

Vawiin program hi Lunglei DC Pu Kulothungan A in kaihruaiin Pu Lalmuanzuala, Centre Coordinator, MYC Southern Mizoram Zone in Technical report a pe a, Pu Donny Lalruatsanga, Additional DC, Lunglei in lawmthu sawina hun a hmang.