No.79/2021-2022

Dated Champhai, the 9^th April, 2021: Vawiin chawhnu khan A.H & Vety. Department Champhai buatsaihin Champhai District chhung Myanmar ramri depa awm Zote khuaah ramri kaltlanga ran natna inkaichhawn theih chungchang inzirtirna neih a ni.

Resource Person Dr. C. Lalsawithuama, Chief Veterinary Officer chuan Mizoram chhunga ran hri leng te hi Mizoram chhung atanga darh tan ni lovin ram dang atanga ran kan lakluh atanga inkai darh vek a nih thu a sawi a, tun hnaia Lungsena vawk natna hri leng chu a natna vei zaa zain an thihpui African Swine fever a ni ngei em tih finfiah ni lo mah se, rinhlelh a nih thu sawiin,  Champhaiah pawh hri leng palh ve reng thei a nih avangin fimkhur a ngai hle tih a sawi bawk. 

Chief Veterinary Officer chuan nikum lawkah India ram chhung State thenkhat leh Myanmar-ah te ASF a len avangin Champhai District-ah thla hnih dan zelah ram dang atanga vawk lakluh khapna thupek chhuah a ni chungin a ruka lak luh a awm reng thu a sawi a. Myanmar atanga dan lova ran la lutte avangin Mizoram chu dinhmun hlauhawm takah a ding mek tih sawiin, khawtlang hruaitute leh vawk vulhtute chu venpui turin a sawm a, tun dinhmunah ASF a leng tih hriat ni lo mahse, ram dang atanga vawk kan lakluh reng chuan he hri hlauhawm tak hian min la luhchilh vat dawn tih sawiin, vawk la lut thinte pawh sim tura ngenin midang la lut an hriatte chu thuneitute hnena hriattir vat turin a ngen a ni.  

He hunah hian vawk natna a len thulha invenna tur hrang hrangte kalkhawmte hrilhfiah niin, mahni vawk in theuhte pawn lam mi tlawh tir lo turte, vawk damlo an awmin khung hran vat tur te, vawk in tih thianghlim dan leh damdawi hman tur hrang hrangte bakah vawk thi sawngbawl dante VC member, vawk vulhtu leh NGO hruaitute zirtir an ni.