No.80/2021-2022
Aizawl, 9th April, 2021: Nimin April 8 zan khan Sports Minister Pu Robert Romawia Royte chuan Mizo infiammi zinga professional registration neia, infiamna eizawn nana hmangtute pualin Aizawl Club-ah zanriah a buatsaih a.
Function tawite neihah thu sawiin Pu Robert Romawia chuan Professional Players te chu Mizoram timawitu an nih angin chawimawi an phu a ni, a ti a. Mizoram sorkarin infiamna chu taksa insawizawina ringawt ni lovin zirna, eizawnna leh sumdawnna pawimawh a nih zel a duh thu leh tuna Boxing leh Football bika Mizoramin professional players a neih zat nei ve hi state pahnih khat bak an awm lo ang a ti a. Mizoram sorkarin infiamna ruhrel tam tak a siam mek tih sawiin Astro turf football field 24 siam thar tura ruahmanah 3 chu zawh thar a ni a, a dangte pawh thawh chhoh mek a ni tih a sawi a. Boxing Ring la awm lohna district thar 3 - Saitual, Khawzawl leh Hnahthial ah te pawh Boxing Ring dah thuai tum a nih thu a sawi a. Infiammite chu nasa taka tan la thar zel turin a fuih a ni.
He huna telve Pu TC Pachhunga Ex-MLA,Vice Chairman SEDP Board pawhin thu sawiin Mizo thalai tam takin professional level an thleng pha chu chhuanawm a tih thu a sawi a, nasa lehzuala tan la zel turin a fuih a.
Mizo Professional Footballers Association aiawha thusawitu Footballer Jeje Lalpekhlua MPFA President pawhin thusawiin Sports Minister Pu Robert Romawia’n professional players te puala duhsakna zanriah a buatsaih chu an ngaihluin an la tawn ngailoh thil a ni, a ti a. Boxing lam aiawha thusawitu World Youth Champion Lalrinsanga Tlau pawhin Professional Boxers te aiawhin Sports Minister chungah lawmthu a sawi bawk a ni.
He zanriah kilhonaah hian Professional Players 40 vel leh Pu Lalsangliana Sports Director,Pu John Tanpuia Secretary MSSC te an tel bawk a ni.
Attachment
- Loading attachment...
