2186/2022-2023

Aizawl 5th October 2022: Nimin ni 4.10.2022 khan Pu L.Thangmawia, Vice Chairman, HRD Board chuan Zote ‘S’ Branch YMA Diamond Jubilee lawmna a hmanpui.

Pu L.Thangmawia chuan YMA hi Mizorama chanchin tha rahchhuahte zinga Mizo mipuiten vawiin thlenga an tangkaipui berte zinga mi a ni a ti a. Kum 1935 June ni 15 khan sap missionary te kaihhruaina hnuaiah YMA hi din a ni a, a dintuten Pathian hming lam chunga an din avang leh a din dan a dik avangin vawiin thlengin par a la chhuang zel a ni a ti.  Zote ‘S’ Branch YMA in a kum 60-na, Diamond Jubilee an thleng chu a lawmpui thu sawiin YMA ropuina em em chu 'langsar lo rawngbawlna' a kalpui thin vang a ni a ti bawk. YMA rawngbawlnate hi mite thik loh rawngbawlna, miten hre dawn miah lo mahsela midangte tana mahni hun leh tha pekna lam hlir a ni a, chu rawngbawlna chu mitin ten mahni chhungkua leh khawtlangah nasa zawka an kalpui chuan chhungkua, khawtlang leh ram hmel a tha zawngin a danglam dawn a ni a ti.

Pu Thangmawia chuan Mizo ram leh hnam kal zelna atan hnam tawng ngaihhlut a ngai a ni a ti a. Saptawng lam dik lo deuh nuihzat thin hi sim a hun tawh a, mahni tawng - Mizo tawng - lam dik lo leh ziak dik lote nuihzat zawk a hun tawh a, Mizo hnam tawng ngai hlu thar zual tura YMA pawhin tan a lak a tul a, sap tawng hi thiam ngei ngei a ngaih rualin pianpui tawng a nih loh avangin tlema nal lo deuhte pawh khawvelin a hrethiam em em zawk a, chutih rual erawh chuan zirna atan sap tawng a pawimawh avangin thiam a ngai chauh zawk a ni a ti.

Diamond Jubilee lawmna inkhawmah hian Pu V. Lallungmuana, Member, Industrial Development Board chuan Souvenir a tlangzarh a. Pu LH Liansanga, Vice President, Zote S YMA in inkhawm hi kaihruaiin T.Upa R.Lalremsanga’n hunserh a hmang a, Pu F.Lalremliana, Fin. Secy.-in inlawmna thu sawiin Pu Kailiana Ralte, Commissioner, Taxation Department pawhin thu a sawi a,  Zote Welfare Committee Aizawl leh Thenzawl ten report an pe bawk a ni.

Attachment

  • Loading attachment...