2187/2022-2023

Aizawl 5th October 2022: An kum 25 tlin champhaphak lawmna kal zelah Mizoram Florists’ Association chuan vawiin atanga tanin October ni 8 thlengin Silver Juibilee Flower Show cum Fair chu Aijal Club Park ah an buatsaih dawn a. Vawiin chawhma khan a hawnna hun neih niin Deputy Chief Minister Pu Tawnluia chu khuallian a ni.

Pu Tawnluia chuan Flower Show cum Fair hawnna inkhawma kal zawng zawng te chibai bukin hlim taka fair hmang turin duhsakna a hlan a. Mizoram Florists’ Association ten kum 25 an tlin lawmna puala programme hrang hrang an buatsaihte hlawhtling taka hmang zel tura duhsakna hlanin Golden Jubilee hlim taka hmang thei tura pawl insawhnghet ni turin duhsakna a hlan a ni. Pangpar chingtute leh zuar tute tana pawl din Florists’ Association ten an thil tum zingah pangpar chin, khawi leh zawrh kawngah sawrkar hmalakna thlawp tlat an tum chu lawmawm a ti a. Sawrkarin mipuite dinhmun chawikanna tura hmalakna a neih mek SEDP ah pawh pangpar chin leh zawrh kawnga eizawnna ngel nghet siam hi a tel ve a ni, a ti. Mizoram chhung a mi ngei pangpar chi hman ni se, loh theih lohah chauh state pawn atanga lakluh ni se tia Florists’ Association te hmalakna chu lawmawm tiin ram hmangaihtu rilru a nih thu  Deputy Chief Minister chuan a sawi a. He pawl hmalakna hi ram than zelna leh hmasawnna in a ken tel pawimawh tak a ni tih sawiin theihtawp chhuah zel turin a fuih a ni. Pangpar hian nun a tihlim a, hmunhma a cheimawi a, khual tha indawnsawn nikhuaah a tangkai a, Mizoram Florists’ Association te thahnemngaihna a zarah ram changkang thenkhat te aiin pangpar khawi kawngah Mizote kan hnufual bik lo, Pu Tawnluia chuan a ti a, tan la thar zel turin pawl member te a fuih a ni. 

Mizoram Florists’ Association hian an din champhaphak kum 25-na lawmna programme hrang hrang an buatsaih mek zel a. Ei siam zirna leh pangpar khawi zirna te pawh an lo buatsaih tawh a, a lawmna pui ber hi thlathar Novermber thla hian neih an tum a ni. Kum 1998 ah pawl danpui nei tanin General Assembly hmasa ber an nei a ni. 

Silver Jubilee Flower Show cum Fair hawnna inkhawm hi an pawl Vice President Dr Lalkailiani’n a kaihruai a. Horticulture Departmemt a Additional Director Pu L.Lalhmingmawia leh Flower Show endiktu tura ruat ten thu an sawi a. MFA President Pi Lalnuntluangi’n lawmthu sawiin hun hnung a khar a ni. Ni 4 chhung awh tur he Flower Show cum Fair hi Horticulture Department in a sponsor a. MFA tan hian khuallian Deputy Chief Minister Pu Tawnluia hian cheng 20,000 a hlan bawk a ni.